Юқоридаги инфографикада Халқаро валюта жамғармаси (ХВЖ)нинг World Economic Outlook номли сўнгги ҳисоботига кўра, 2025 йилнинг энг тез ўсувчи иқтисодиётлари кўрсатилган. Жанубий Судан иқтисодиёти ўтган йили шикастланган асосий нефт қувур линиясини тиклашдан кейин деярли 25 фоизга ўсиши кутилмоқда.
Шунга қарамай, Жанубий Судан иқтисодиёти жуда ҳам заиф ҳолатда қолмоқда. Қўшни Судандаги можаро мамлакат миллий даромадининг тахминан 90 фоизини ташкил этувчи нефт етказиб беришни яна издан чиқариши мумкин.
Худди шундай, Ливия ва Гайанада ЯИМнинг юқори ўсиши ҳам нефт экспорти ҳажмларининг ошиши билан боғлиқ. Хусусан, Гайана нефт саноати 2025 йилнинг ўзида тахминан 2,5 миллиард доллар даромад келтириши, 2030 йилга бориб эса мамлакат соҳиллари яқинида очилган йирик конлар ҳисобига бу кўрсаткич 10 миллиард долларга етиши мумкинлиги қайд этилган.
Ривожланган иқтисодиётлар орасида ушбу рўйхатга фақат Ирландия кирди. Бу ерда ўсиш, асосан, Трамп маъмурияти томонидан тарифлар жорий этилишидан олдин фармацевтика маҳсулотлари экспорти ошиши ҳисобига таъминланмоқда.
Шу орада, савдо соҳасидаги кескинликлар сақланиб қолаётганига қарамай, Ҳиндистон иқтисодиёти 6,6 фоизга ўсиши кутилмоқда. Дунёда энг юқори даражадаги бож ставкаларидан бири саналадиган 33–36 фоизлик божларга қарамасдан, АҚШга товар экспорти мамлакат ЯИМнинг тахминан 2 фоизини таъминлаб берувчи муҳим омил бўлиб қолмоқда.
