Банклар хусусийлаштирилади, давлат ихтиёрида 4 та банк қолади

“Ўзбекистон – 2030” стратегияси лойиҳасида банк тизимида ислоҳотларни жадаллаштириш, бозор ҳажмини кенгайтириш ва рақобатни ривожлантириш мақсадида банкларни хусусийлаштириш чоралари назарда тутилган. Лойиҳада давлат иштирокини қисқартириб, давлат ихтиёрида 4 та банкни сақлаб қолиш режалаштирилмоқда.

Стратегия лойиҳасига мувофиқ, банк тизимида рақобат муҳитини кучайтириш ва хизматлар бозорини кенгайтириш учун ислоҳотлар жадаллаштирилади. Шу доирада банкларни хусусийлаштириш ва давлат ихтиёрида 4 та банкни сақлаб қолиш режалаштирилган. Мазкур ёндашув банк секторини бозор механизмлари асосида ривожлантириш, корпоратив бошқарув стандартларини кучайтириш ҳамда молия хизматлари сифатини ошириш мақсадлари билан боғланган.

Лойиҳада молия бозори фаоллигини ошириш бўйича бир қатор миқдорий кўрсаткичлар ҳам белгиланган. Хусусан, банк ва молия тизимида йиллик кредитлаш ҳажмини 720 триллион сўмга етказиш, тижорат банклари депозитлари қолдиғини 560 триллион сўмгача ошириш режалаштирилган. Шу билан бирга, давлат банклари активларининг жами банк тизими активларидаги улушини 55 фоизгача камайтириш мақсад қилинган.

Ислоҳотлар контекстида молиявий маҳсулотлар хилма-хиллигини ошириш масаласи ҳам кўтарилган. Лойиҳада Ўзбекистонда исломий молиянинг ҳуқуқий асосларини яратиш ва камида 3 та тижорат банкида исломий молия хизматларини йўлга қўйиш режалаштирилмоқда. Бу орқали молия бозорида қўшимча инструментлар пайдо бўлиши ва мижозлар учун танлов кенгайиши кутилмоқда.

Стратегия лойиҳасида белгиланган мазкур чора-тадбирлар банк секторини ислоҳ қилиш, давлат иштирокини босқичма-босқич қисқартириш, хусусий капитални жалб этиш ва молия тизими самарадорлигини оширишга қаратилган.