Ўзбекистон ЖСТ аъзоси бўлиш учун фақат бир давлат билан музокарани якунлаши қолди

Ўзбекистон Жаҳон савдо ташкилотига (ЖСТ) аъзо бўлиш учун фақат бир давлат билан икки томонлама музокарани якунлаши керак. Бу ҳақда президентнинг ЖСТ бўйича вакили Азизбек Урунов маълумот берди. Аввалроқ, у бу давлат Тайван эканини айтган эди.

Қайд қилинишича, 2025 йилда ЖСТ аъзоси бўлган 34 давлатдан 33 таси билан икки томонлама музокаралар якунланди. Жумладан, Европа Иттифоқи, Хитой, Россия, Буюк Британия, Швейцария, Канада, Австралия ва бошқа йирик савдо ҳамкорлари билан келишувларга эришилди.

Шунингдек, ЖСТ талабларига мувофиқ 30 та норматив-ҳуқуқий ҳужжат қабул қилинди, жумладан: 4 та қонун, президентнинг 8 та фармони ва қарорлари, Вазирлар Маҳкамасининг 12 та қарори, 6 та идоравий ҳужжат, қўшимча равишда 29 та норматив-ҳуқуқий ҳужжат лойиҳаси тайёрланди.

Таъкидланишича, божхона тартиботлари, экспорт божлари, савдони ҳимоя қилиш чоралари, интеллектуал мулк ҳуқуқларини ҳимоя қилиш, техник тартибга солиш, санитария ва фитосанитария ҳамда савдодаги техник тўсиқлар (SPS ва TBT) соҳаларида комплекс ислоҳотлар амалга оширилди.

Уруновнинг сўзларига кўра, 2026 йил учун устувор вазифалар: Тайван билан икки томонлама музокарани якунлаш, кўп томонлама музокаралар ва Ишчи гуруҳ ҳисоботини тугатиш, қонунчиликни тўлиқ мувофиқлаштириш ва Ўзбекистоннинг ЖСТ аъзоси бўлиш жараёнини якунига етказиш.