Кам литражли автомобиллар учун божлар ошди

Ўзбекистонда двигател ҳажми 1000 ва 1200 см кубгача бўлган енгил автомобиллар импорти учун бож имтиёзининг амал қилиш муддати якунига етди ва ставкалар аввалги даражага қайтди.

Пасайтирилган ставкалар 2023 йил 17 июлдан кучга кирган ва 2026 йил 1 январга қадар ишлаб чиқарилганига 1 йилдан ошмаган янги енгил автотранспорт воситаларини олиб киришда божхона божларининг қуйидаги ставкалари белгиланган эди:

• двигател цилиндрларининг иш ҳажми 1 000 см кубдан ошмайдиган янги енгил автотранспорт воситалари учун – 0 ставка;
• двигател цилиндрларининг иш ҳажми 1 200 см кубдан ошмайдиган янги енгил автотранспорт воситалари учун – 5 фоиз ставка.

Ўша вақтда бу қарор автомобил бозорида рақобатни ривожлантириш ва аҳолини ҳамёнбоп енгил машиналар билан таъминлашга қаратилгани айтилган эди.

Имтиёз муддати узайтирилмади ва 2026 йил 1 январдан қуйидагича ставкалар амал қила бошлади:

• 1000 см кубгача – 15 фоиз ва ҳар бир см куб учун 0,4 АҚШ доллари;
• 1200 см кубгача – 15 фоиз ва ҳар бир см куб учун 0,6 АҚШ доллари.