АҚШ президенти Доналд Трамп Американинг Венесуэла ишларига аралашуви бир неча йилга чўзилиши мумкинлигини айтди. New York Times газетасига берган интервюсида унинг маъмурияти Жанубий Америкадаги бу мамлакатни бошқаришни қачонгача «назорат қилиши»ни «фақат вақт кўрсатиши»ни айтди.
Трамп Венесуэлада Николас Мадуронинг сафдоши бўлган ва вақтинча президентга айланган Делси Родригес ўрнига янги раҳбар сайланадиган сайловлар ўтказилиши юзасидан аниқлик киритмаган.
Бу вақтда Делсининг акаси, Миллий ассамблея спикери Хорхе Родригес Венесуэла ҳукумати «кўп сонли» маҳбусларни (ҳам венесуэлаликлар, ҳам америкаликлар) озод этишга қарор қилганини маълум қилди.
Родригес бу ҳеч ким билан келишилмаган, фақат бир томонлама яхши ният акти бўлишини қайд этган. Унинг сўзларига кўра, маҳбусларни озод этиш жараёни аллақачон бошланган.
Айнан кимларни қўйиб юбориш режалаштирилаётгани ҳозирча номаълум, аммо Испания ТИВдагилар Венесуэла аллақачон беш нафар испанияликни озод этганини маълум қилди, улар орасида қўшфуқароликка эга бўлган таниқли ҳуқуқ фаоли Росио Сан Мигел ҳам бор.
Аввалроқ Испания ташқи ишлар вазири Хосе Мануэл Албарес бу қарорни Венесуэла ҳукуматининг «жуда ижобий қадами» деб баҳолаганди.
Венесуэла мухолифати етакчиси Мария Корина Мачадо пайшанба куни Мадуронинг қулаши Венесуэланинг озод бўлишига олиб борадиган ортга қайтмас жараённи бошлаб берганини айтганди.
Трамп Родригесдан мамнун ва Мачадони эътиборсиз қолдирмоқда
Carlos Becerra / Getty Images
Трамп NYT мухбирига АҚШ давлат котиби Марко Рубио Делси Родригес билан доимий алоқада бўлиб турганини айтган, олдиноқ АҚШ президенти Мадуронинг ўринбосари «Америка зарур деб ҳисоблаган барча ишни қилишга тайёрлиги»ни айтганди.
АҚШ президентига кўра, Венесуэланинг вақтинча ҳукумати нефт сотувидан тушган даромадларни фақат Америка томонидан ишлаб чиқарилган маҳсулотларни сотиб олишга сарфлашга рози бўлган.
NYT журналистлари қайд этишича, Трамп нима учун Родригесни Венесуэланинг янги етакчиси деб тан олгани ҳақидаги саволни очиқ қолдирган.
Кўплаб таҳлилчилар Мадуро ҳокимиятдан ағдарилгач, мухолифат етакчилари Эдмундо Гонсалес Уррутиа ва Мария Корина Мачадо мамлакатга қайтишини кутганди. Бироқ, Трамп Мадуро қўлга олинганидан кейинги биринчи матбуот анжуманида Мачадо ҳақида тўхталиб, венесуэлаликлар уни ҳурмат қилмаслиги ва қўллаб-қувватламаслигини айтди.
