Ўзбекистонлик ҳайдовчилар учун Японияда ойига камида 2 минг доллар маош таклиф этилмоқда

Япониянинг йирик Proud & Partners компанияси президенти Рюжи Сузуки “Дунё” ААга берган маълумотида компания хориждан ишчи кучини Япония иқтисодиётига қонуний ва тизимли тарзда жалб қилиш билан шуғулланишини айтди. Унинг сўзларига кўра, бугунгача қарийб 5 минг нафар хорижий фуқароларни Япония меҳнат бозорига олиб киришга муваффақ бўлинган.

Сузуки Японияда демографик инқироз натижасида логистика ва қурилиш каби асосий тармоқларда ишчи кучи етишмаслиги кучайиб бораётганини таъкидлади. Шу боис компания тайёр ишчи кучини “тайёр ҳолда” жалб қилиш ўрнига, мутахассисларни ўз давлатларида тил ва касбга тайёрлаш марказлари орқали ўқитиш, малакасини ошириш ва аниқ иш ўринлари билан таъминлаш тамойили асосида иш олиб бораётганини билдирди.

Маълум қилинишича, лойиҳанинг дастлабки босқичи юк автомобили ҳайдовчиларини тайёрлашга қаратилган. Компания Ўзбекистон фуқаролари учун ойига камида 2 минг АҚШ доллари ва ундан юқори маош таклиф этишни асосий шарт сифатида белгилаган.

Шу билан бирга, фаолият йўналишларини босқичма-босқич кенгайтириш режалаштирилмоқда. Хусусан, Қорақалпоғистон давлат университети билан ҳамкорликда умумий овқатланиш соҳаси учун мутахассислар тайёрлаш дастури йўлга қўйилган бўлиб, биринчи босқичда юз нафарга яқин кадр тайёрлаш кўзда тутилган. Қурилиш соҳаси учун кадрлар тайёрлаш бўйича эса Ўзбекистон Миграция агентлиги билан ҳамкорликда режалар ишлаб чиқилаётгани айтилди.

Сузукининг қайд этишича, лойиҳани аввалига тахминан 100 нафар иштирокчи билан бошлаш режалаштирилган бўлса-да, Ўзбекистондаги амалий тизим ва кадрлар салоҳияти билан танишувдан сўнг ҳамкорлик имкониятлари анча кенг эканига ишонч ҳосил қилинган. Натижада, япон компанияларига аниқ таклифлар киритиш имконияти пайдо бўлган ва ҳозирда 500 нафар кадрни тайёрлаш ишлари амалий босқичга ўтган. Келгусида эса ташаббусни 5 минг нафаргача кенгайтириш мақсад қилинмоқда.

Компания раҳбарининг айтишича, Proud & Partners фаолияти фақат кадрларни тайёрлаш ва иш берувчилар билан боғлаш билан чекланмайди. Ўзбекистондан тайёрланган мутахассисларни қабул қилган япон компанияларига ушбу кадрлар иштирокида Ўзбекистонда янги бизнес йўналишларини йўлга қўйиш жараёнида ҳам кўмаклашиш режалаштирилган.

Сузуки ушбу ташаббус орқали икки давлат учун манфаатли барқарор бизнес ҳамкорлик занжирини шакллантириш, шунингдек, Ўзбекистон ва Япония ўртасидаги дўстлик ва иқтисодий алоқаларни мустаҳкамлашни асосий мақсад сифатида қайд этди.