«МЮ»да ғалабали серия, Палмерда тарихий ҳет-трик, Ямалда рекорд. Кун ўйинлари

Англия: «Тоттенҳэм» сардорининг қизил карточкаси ҳал қилди

«Манчестер Юнайтед» – «Тоттенҳэм»
Голлар: Мбемо, 38 (1:0). Бруну Фернандеш, 81 (2:0)
«Манчестер Юнайтед»: Ламменс, Магуайр, Мартинес, Шоу (Мазравий, 87), Далот, Каземиро (Угарте, 87), Майну (Флетчер, 90+2), Бруну Фернандеш, Куня (Шешко, 75), Диалло, Мбемо (Зиркзе, 87)
«Тоттенҳэм Ҳотспур»: Викарио, Ромеро, ван де Вен, Палиня (Биссума, 80), Галлаҳер (Тел, 80), Сарр, Удожи (Соуза, 55), Грэй, Симонс, Одобер (Дрэгушин, 32), Соланке (Коло Муани, 80)
Огоҳлантиришлар: Диалло, 45 – Удожи, 27. Палиня, 70
Четлатиш: Ромеро, 29

Яхши формага кириб олган «МЮ» (қаторасига уч ғалаба) асосий таркибни ўзгартирмаяпти. Кэррик яна Шешкони захира ўриндиғида қолдирди, ҳужум марказида эса Куня ва Мбеумо алмашиб ҳаракат қилишди. Уларнинг иккинчиси ҳимояланишда чап қанотни ёпмоқда, тўпга эгалик қилинганида эса ҳужум вакилларидан исталган бири олдинда очилиши мумкин. Футболчиларнинг бундай жойлашувида «МЮ» дастлабки 15 дақиқаликда «Тоттенҳэм»дан яхшироқ кўринди ва жамоада бир неча яхши ҳужумлар уюштирилди.

Кейин эса «Тоттенҳэм» ҳам олдинга ўтди ва қайсидир дақиқаларда тўп Ламменс қўриқлаётган дарвоза атрофидан кетмай ҳам қолди. Аммо ўйин тақдирини Ромеро ишлатган фол ҳал қилди. «Тоттенҳэм» сардори тўпга ўйнашга ҳаракат қилиб, бутсасининг остки қисми билан Каземиронинг тўпиқ қисмига зарба бериб юборди. Ўйин бош ҳаками Майкл Оливер шу заҳоти чўнтагидан қизил карточкани чиқарди.

VAR вазиятга аралашмади, аммо барчаси яққол кўриниб турганди: зарбадан кейин Каземиронинг оёғи қайрилиб ҳам кетганди. Ромеро АПЛнинг бу мавсумида аллақачон икки қизил карточка олган илк футболчига айланди. Аргентиналик ҳимоячи декабрда «Ливерпул»га қарши ўйинда икки сариқ карточка олиб, майдондан четлатилганди.

Бу эпизоддан кўп ўтмай «МЮ» ҳисобни очди. Бу гол бурчак зарбасини олдиндан режалаштирган ҳолда ижро этиш орқали амалга оширилди. Майну дарвозанинг яқин устуни олдида турганча ўзига келган тўпни бир тегинишда жарима майдони марказига йўналтирди, у ерда бўш турган Мбеумо ерлатиб аниқ зарба йўллади. Бу «қизил иблислар» учун жорий мавсумда бурчак зарбалари орқали урилган саккизинчи голга айланди.

Иккинчи бўлим «МЮ» учун жуда қулай шароитда кечди. Мезбонлар яна бир неча бор дарвозани ишғол этишди, аммо ҳар сафар кичик офсайд ҳолатлари туфайли бу голлар бекор қилинди. 

Бу орада «Тоттенҳэм» навбатдаги зарбани қабул қилди – Удожи жиддий жароҳат олиб, майдонни тарк этди. Ўйиндан олдин «шпорлар» лазаретида шусиз ҳам 10 нафар футболчи ётганди, энди жамоа Ромеро ва Удожидан ҳам айрилди. Томас Франк кейинги ўйинга таркиб йиғиши ҳам қийин бўлади.

Мезбонлар шундан кейин узоқ масофалардан зарбалар йўллашга киришди: Шоу, Далот ва Фернандеш ҳисобни 2:0 кўринишига келтириши мумкин эди, аммо Викарио ҳар сафар жамоасини қутқарди. Иккинчи бўлимда зарбалар сони бўйича кўрсаткич 12:2 кўринишига етди.

Ўйин охирида Франк ва-банкка қўл уриб, ўн киши бўлган ҳолда мағлубиятдан қутулиб қолиш учун учталик алмаштириш амалга оширди ва ҳужумга урғу қаратди. Аммо бу иш бермади – бу ўзгаришлардан ўн дақиқа ўтиб Фернандеш Далотнинг узатмасидан кейин дарвозани ишғол этди. Португалиялик яримҳимоячи сўнгги икки ойни жуда кучли ўтказмоқда: у саккиз турда «гол+пас» бўйича 4+7 натижасини қайд этган. У ҳозирда бир мавсумдаги ассистлар сони бўйича АПЛ рекордини ўрнатишни кўзлаган: ҳозирда ундаги голли узатмалар сони 12 тани ташкил этди ва бу борада рекордчи де Брюйнега (20) етиш учун қолган 13 турда 8 ассист амалга ошириши керак бўлади. 

Ҳозирча эса Фернандеш АПЛдаги голли ҳаракатлари сонини 200 тага етказиш (104 гол ва 94 ассист) билан чекланди.

Бу ғалабадан кейин «МЮ» кучли тўртликдаги ўрнини мустаҳкамлади.

Энди сешанба оқшомида бутун дунёдаги мухлислар эътибори «МЮ»нинг «Вест Ҳэм»га қарши сафар ўйинига қаратилади. Агар «Юнайтед» бу ўйинда қаторасига бешинчи ғалабасига эришадиган бўлса, жамоанинг шу мавсумда машҳур бўлиб кетган мухлиси (севимли жамоаси қаторасига беш ғалаба қайд этмагунича сочини олдирмасликка ваъда берган ва қарийб 500 кундан буён сочи ўсиб кетган мухлис) ниҳоят сартарошга бориши мумкин бўлади.

«Арсенал» – «Сандерленд» 3:0
Голлар: Субименди, 42 (1:0). Йокереш, 66 (2:0). Йокереш, 90+3 (3:0)
«Арсенал»: Райя, Салиба, Габриэл Магаляйнс, Калафиори (Инкапие, 67), Тимбер, Субименди, Райс, Ҳаверц (Эзе, 67), Троссар (Норгар, 89), Мадуэке (Мартинелли, 60), Габриэл Жезус (Йокереш, 60)
«Сандерленд»: Руфс, Баллард, Алдерете, Мандава, Мукиеле, Диарра, Садики (Гертрейда, 71), Ле Фе, Талби (Мандл, 64), Ҳюм (Ангуло, 85), Бробби (Изидор, 85)
Огоҳлантиришлар: Салиба, 26 – Диарра, 39. Бробби, 40

Бу мавсумда бир неча бор гранд рақиблардан очко тортиб олишга эришган «Сандерленд» «Эмирейтс»даги ўйиннинг биринчи бўлимида дарвозаси дахлсизлигини сақлаб қолишга яқин эди, аммо бўлим охирида «қора мушуклар» жамоаси ўз жарима майдонига қамалиб олди ва мезбонлар бунга узоқ масофадан зарба йўллаш орқали чора топди. Троссардан тўпни қабул қилиб олган Субименди жарима майдони ташқарисидан бутсасининг ташқи қисми билан йўллаган зарбаси орқали ҳисобни очди – зарба техник жиҳатдан шу қадар мукаммал бўлиб чиқдики, тўп дарвозабонга ҳеч қандай имконият қолдирмасдан, устун ёнидан дарвоза тўрига кирди.

Испаниялик яримҳимоячи ўз голини жароҳат туфайли мавсум охирига қадар сафдан чиққан жамоадоши Меринога бағишлади.

Иккинчи бўлимда эса меҳмонлар ҳимоядан чиқишда хатога йўл қўйди, тўпни эгаллаб олган Троссар голли ҳужумни бошлаб берди ва жарима майдони яқинидаги Ҳаверцни тўп билан таъминлади, у эса жарима майдони ичида очилган Йокерешга голли узатма берди. Германиялик яримҳимоячи узоқ вақт жароҳатини даволаб, сафга қайтганидан кейинги қисқа муддатда 4 голли ҳаракатни (2+2) амалга оширди, унинг икки паси ҳам швециялик ҳужумчига узатилган.

Ўйинга қўшиб берилган дақиқаларда Йокереш дублни расмийлаштирди. Мавсумнинг биринчи ярмида мослашиш жараёнида бўлган швециялик ҳужумчи яхши спорт формасига кириб бормоқда. 2026 йил бошидан буён у барча турнирлар доирасида олти гол уришга эришди, унинг мавсум бошидан буён барча турнирлар доирасида урган голлари сони эса 13 тани ташкил этмоқда (иккинчи ўриндаги Мартинеллида 10 та гол).

Кетма-кет иккинчи ўйиндаги йирик ғалабадан кейин Артета шогирдлари турнир жадвалидаги биринчи ўринни мустаҳкамлаб олди. «Арсенал» 2003/04 йиллар мавсумидан буён илк бор ўйин кунини иккинчи ўриндан 9 очколик фарқ билан якунлашга эришди. Бугун «Сити» «Ливерпул»га қарши сафар ўйинида ютқазадиган бўлса, иккинчи ўрин билан орадаги фарқ 9 очколигича қолади.

Ҳозирча чемпионлик ҳақида гапиришга бироз эрта, лекин «канонирлар» уйда 44 ўйиндан буён чемпионшипдан чиққан жамоаларга ютқазмаяпти (+39=5) ва бу орқали «Челси» томонидан 2001-2015 йилларда ўрнатилган рекордга барҳам берилди.

«Борнмут» – «Астон Вилла» 1:1
Голлар: Роджерс, 22 (0:1). Райан, 55 (1:1)
«Борнмут»: Петрович, Сенеси, Ҳилл, Трюффер, Ҳименес (Смит, 86), Кук, Скотт, Крупи (Кристи, 65), Адли, Райан (Брукс, 87), Эванилсон (Юнес Унал, 90)
«Астон Вилла»: Мартинес, Конса, Мингс, Дин (Богард, 86), Кэш, Дуглас Луис (Матсен, 77), Онана, Буэндия (Бэйли, 66), Роджерс, Санчо (Баркли, 77), Уоткинс (Абраҳам, 86)
Огоҳлантиришлар: Хименес, 35 – Буэндия, 35

Ўтган турда «Астон Вилла» ўз уйида кутилмаганда «Брентфорд»га ютқазиб қўйганди. Аммо ўша ўйинга бирмингҳэмликларнинг таркибидаги муаммоларни инобатга олган ҳолда қаралса, бу у қадар сенсация эмаслигини кўриш мумкин. Жамоа ҳужумчиларидан бири Мален Италияга йўл олди, шунингдек, Унаи Эмери жароҳатлар туфайли яримҳимоядаги қатор футболчиларидан айрилган – Камара мавсум охирига қадар сафдан чиқди, жамоа сардори Макгинн ҳамда Тилеманс ҳам жамоага ёрдам бера олмаяпти.

Бундай вазиятда ўтган йил охиридан буён гол урмай қўйган Роджерсга гол сезиш қобилияти қайтиши айни муддао бўлди. У биринчи бўлим ўрталарида Санчонинг рақиб ҳимоячилари орасидан ўтказиб берган нозик узатмасидан кейин дарвоза тўрини кучли зарба билан ўққа тутди. Аммо иккинчи бўлим бошида «Борнмут» сафида ҳам ўз қаҳрамони топилди – қишки трансферлар доирасида «Васка да Гама»дан 28,5 миллион еврога харид қилинган Райан ҳисобни тенглаштирди.

19 ёшли бразилиялик ўтган турда АПЛда захирадан тушиб, дебют қилган ва голли пас муаллифи бўлганди. Энди Марк Силва уни бошланғич таркибга киритди ва у яна ишончни оқлади. Райан ташаббусни ўз қўлига олиб, ўнг қанотдан жарима майдонига кириб борди ва рақибнинг бир неча футболчиси орасидан осонлик билан ўтиб кетиб, яқин бурчакка йўллаган зарбаси билан дарвозабонни ҳам доғда қолдирди. «Вилла» навбатдаги очко йўқотишдан кейин ҳам учинчи ўринда қолмоқда, аммо жамоанинг ўз таъқибчилари билан орадаги фарқи қисқаришда давом этмоқда: жамоа сўнгги беш турда 10 очко йўқотди (1 ғалаба, 2 дуранг, 2 мағлубият).

«Вулверҳэмптон» – «Челси» 1:3
Голлар: Палмер, 13 – пеналти (0:1). Палмер, 35 – пеналти (0:2). Палмер, 38 (0:3). Арокодаре, 54 (1:3)
«Вулверҳэмптон»: Жозе Са, С. Буэно, Москера, У. Буэно, Доэрти (Р. Гомеш, 46), Гомес (Педро Лима, 90+1), А. Гомеш (Беллегард, 80), Армстронг, Мане, Ҳванг Ҳи Чҳанг (Крейчи, 43), Арокодаре
«Челси»: Санчес, Чалоба, Фофана, Кукуреля, Гюсто (Ачимпонг, 75), Сантос (Ҳато, 84), Кайседо, Фернандес, Педру Нету, Палмер (Гарначо, 61), Жоао Педро (Делап, 75)
Огоҳлантиришлар: Армстронг, 45 – Кукуреля, 73

Пешқадамлар гуруҳидаги энг осон ўйин «Челси»да бўлди, лондонликлар биринчи бўлимнинг ўзида «Вулверҳэмптон» мудофаасини яксон этишди, Палмерга эса ҳет-трик расмийлаштириш учун 25 дақиқа етарли бўлди. Коул аввалига икки пеналтини аниқ ижро этди, бўлим охирларида Кукурелянинг узатмасини голга айлантирди. Бу орқали кун қаҳрамони икки бор тарихга кирди. Биринчи навбатда, у турнир тарихида учта ўйинда биринчи бўлимнинг ўзида учтадан гол урган илк футболчига айланди. Иккинчидан, АПЛдаги ҳет-триклар сони бўйича (4) «Челси» клуби рекордчисига айланди. Ушбу яримҳимоячи голларидан бирини қулоқларини қўллари билан ёпган ҳолда нишонлади, бу орқали у ўзи туғилиб ўсган Манчестер шаҳрига қайтиб, «МЮ»га ўтишни истаётгани ҳақидаги миш-мишларга муносабат билдирди.

Испания: Берналнинг илк голи

«Барселона» – «Малйорка» 3:0
Голлар: Левандовски, 29 (1:0). Ямал, 61 (2:0). Бернал, 83 (3:0)
«Барселона»: Х. Гарсия, Кубарси, Э. Гарсия, Балде, Кунде, Фермин Лопес (Маркес, 84), Касадо, Олмо (Бернал, 67), Рэшфорд (Торрес, 67), Ямал (Жоау Канселу, 78), Левандовски (Баржи, 78)
«Малйорка»: Роман, Валент, Лопес, Моҳика, Маффео, Маскарел, Кошта (Морланес, 77), Пабло Торре (Санчес, 62), Вирҳили (Дардер, 62), Морей (Жозеф, 62), Муричи (Лябрес, 77)

«Барселона» ла лиганинг 23-тури арафасида турнир жадвалида пешқадамлик қилаётганди, аммо «Реал» атиги бир очколик фарқ билан таъқиб этиб келмоқда.

Бундай вазиятда Ҳанс-Дитер Флик жамоаси «Малйорка»ни мағлуб этиши талаб этиларди. Рақиб турнир жадвалининг 13-ўрнида – хавфли ҳудуддан икки очколик масофада жойлашган. «Малйорка» бу мавсумда сафар ўйинларини жуда ёмон ўтказмоқда – чемпионатнинг сафардаги 11 ўйинида биргина ғалаба. «Барса» эса уйдаги 10 ўйинда 10 ғалабага эга эди.

«Барселона» бу ўйинда ҳам ўз анъанасига кўра биринчи бўлиб гол ўтказиб юборишига бир бахя қолди. Ўйиннинг 21-дақиқасигача меҳмонлар тўрт бор зарба беришди, мезбонларда эса атиги бир зарба бўлди. Фақат бўлим ўрталарига бориб каталонияликлар ташаббусни ўз қўлига ола бошлади ва бунда Рэшфорд асосий ишни бажарди. Унинг узоқ масофадан йўллаган дастлабки зарбаси меҳмонлар учун огоҳлик қўнғироғи бўлганди, иккинчи зарбасидан кейин тўп ҳимоячига теккан ҳолда йўналишини ўзгартирди ва Левандовскига бориб тушди, полшалик ҳужумчи чемпионатнинг бу мавсумидаги ўнинчи голини уришга эришди.

Иккинчи бўлим бошларида эса Ямал ҳам мавсумдаги голлари сонини ўнтага етказиб қўйди. Бурчак зарбаси ижро этилганидан кейин у узоқ масофадан тўпни айлантириб бурчакка йўналтирди, дарвозабон эса реакция кўрсатишга ҳам улгурмади. Энди Ҳанси Флик жамоасида бирданига уч нафар футболчи (Левандовски, Ямал, Ферран Торрес) камида ўнтадан гол урган. Етакчи лигаларда бундай натижа билан фақат «Бавария» мақтана олади (Кейн, Олисе, Диас).

Ламин учун бу ўз фаолиятида илк бор ла лиганинг бир мавсумида 10 гол уриши бўлмоқда. Бундан ташқари, у – кучли бешликда мавсум бошидан буён юз мартадан ортиқ муваффақиятли алдаб ўтишларни амалга оширган илк футболчига айланди. Таққослаш учун, бу борадаги иккинчи ўринда турган «Манчестер Сити» вингери Докуда бу кўрсаткич 38 тага камроқ. Умуман олганда, Ямал ўз даражасидаги ишларни бажариб келмоқда, ўйинда якуний ҳисобни ўрнатган Бернал учун эса бу катталар футболидаги илк голга айланди. Ушбу 18 ёшли яримҳимоячи Фермин Лопеснинг пасидан кейин икки ҳимоячидан қочиб кетди, рақибнинг бир футболчисини финт билан газонга ётқизди ва яқин бурчакни аниқ нишонга олди.