Кипрдаги авиабазага ҳужум қилган дрондан Россияда чиқарилган қисмлар топилди

2 мартга ўтар кечаси Кипрдаги Британиянинг Акротири авиабазасига зарба берган дрон Россия ҳарбий техникаси билан жиҳозланган бўлган.

“Унинг бортида Россияда ишлаб чиқарилган ‘Комета-Б’ навигация тизими бор эди — бу қурилма илк бор декабр ойида Украина ҳаво мудофаа воситалари томонидан тутиб олинган дронларда аниқланган”, — дейилади 7 март, шанба куни Британиянинг The Times кундалик газетаси сайтида чоп этилган материалда.

Нашрда айтилишича, Британия ҳарбий разведкаси аниқланган қисмларни кейинги тадқиқотлар учун мамлакат ичидаги лабораторияга юборган.

Ҳужумни Эрон қўллаб-қувватлайдиган Ливаннинг “Ҳизбуллоҳ” гуруҳи жангарилари амалга оширган бўлиши мумкин, деб тахмин қилинмоқда.

Таъкидланишича, мазкур топилма АҚШ ва Исроилнинг Эронга қарши урушида Россия ҳарбий техникаси қўлланганини илк бор кўрсатмоқда ва бу ҳолат ушбу ҳарбий тўқнашувда Москва таъсирининг ортиб бораётгани ҳақида хавотирларни кучайтирмоқда.

“Бу, Россия Эронга минтақадаги Америка кучларига, жумладан АҚШ ҳарбий кемалари ва самолётларининг жойлашув нуқталари бўйича ҳужум қилишга ёрдам бериш учун разведка маълумотларини узатаётгани ҳақидаги хабарлар ортидан юз берди”, — деб ёзади Британия газетаси.

The Times қайд этишича, ҳозирда Кипрга 6 март куни етиб келган иккита Wildcat вертолётини ҳам ўз ичига олган Британия ҳарбий объектлари Эрон ва унинг Ливан ҳамда Ямандаги тарафдорлари ҳужумларининг нишонига айланиши мумкинлиги ҳақида хавотирлар мавжуд.

7 март куни Британия Яқин Шарқдаги ҳарбий имкониятларини кенгайтираётганини эълон қилди. Хусусан, яқин кунларда HMS Prince of Wales номли иккинчи авиаташувчи ҳам Форс кўрфазига юборилиши мумкин. Британия Мудофаа вазирлиги бундан олдин мамлакат минтақадаги иштирокини “кучайтираётганини” таъкидлаган эди.

Украина президенти Володимир Зеленский 5 март куни Россия Эронга қурол етказиб бераётганига ишонишини билдирди.

“Биз улар Shahed учун электроника етказиб бериши мумкинлигини тушунамиз. Менимча, бунинг барчасини бугун Яқин Шарққа зарба бераётган Shahed парчаларидан топиш мумкин. Эроннинг Shahed дронлари Россияда ишлаб чиқарилган қисмларни ўз ичига олади. Бу — биз аниқ биладиган нарса,” деди Зеленский.

Кипрдаги Британиянинг Акротири ҳарбий-ҳаво базаси 2 мартга ўтар кечаси Эрон дрони ҳужумига учради. Базага унча катта бўлмаган моддий зарар етганини Кипр президенти Никос Христодулидис маълум қилди. У шу билан бирга, унинг мамлакати “ҳеч қандай тарзда ҳарбий операцияларда иштирок этмаётгани ва иштирок этиш ниятида ҳам эмаслиги”ни таъкидлади.

Reuters агентлиги манбаларига таяниб ёзишича, Акротири авиабазасига иккита дрон ҳужум қилган, улардан бири тутиб қолинган.

Британия мудофаа вазири Жон Ҳили Баҳрайн ва Кипрдаги авиабазалардан парвоз қиладиган Британия самолётлари аниқланган дронлар ва ракеталарни уриб туширишини айтди.

АҚШ президенти Доналд Трампнинг махсус вакили Стивен Уиткофф АҚШ ва Исроил ҳарбий операция олиб бораётган Эронга Россия ёрдам кўрсатмаслигини қаттиқ талаб қилган. Бу ҳақда Уиткоффнинг ўзи 8 мартга ўтар кечаси президент самолёти Air Force One бортида журналистлар саволларига жавоб берар экан, маълум қилди.

Журналистларнинг у Россия раҳбариятига Эрон билан разведка маълумотларини бўлишмаслик кераклигини айтган-айтмагани ҳақидаги саволига Трампнинг махсус вакили шундай жавоб берди: “Мен буни қатъий тарзда айтдим”. У бошқа тафсилотларни келтирмади.

Бундан аввал CNN телеканали ва The Washington Post газетаси АҚШ махсус хизматларидаги манбаларига таяниб, Москва Теҳронга Америка қуруқликдаги қўшинлари, ҳарбий кемалари ва авиациясининг жойлашуви ҳамда ҳаракатлари ҳақида маълумотлар узатаётганини хабар қилган эди.