Украина Брянскдаги заводга зарба берди

Украина қуролли кучларининг Брянск бўйлаб ракета зарбаси оқибатида олти киши ҳалок бўлди ва 37 киши яраланди. Брянск области губернатори Александр Богомаз ярадорларнинг барчаси шифохонага ётқизилганини маълум қилган.

Регион раҳбари ҳодисани «террорчилик ҳужуми» деб атаган, лекин бу ҳужум оқибатларига ойдинлик киритмаган. «Ушбу ғайриинсоний террорчилик акти оқибатларини бартараф этиш бўйича биринчи навбатдаги чоралар кўрилмоқда», – дея қўшимча қилган Богомаз.

Губернатор Брянскнинг Советский районида ёнғиндан кейин тутун кўтарилгани ҳақида хабар берган, шу билан бирга, ёнғинни украинлар ҳужуми билан бевосита боғламаган. У Брянскда яшовчиларга заруратсиз кўчага чиқмаслик ва деразаларни ичкаридан ёпиб ўтиришни тавсия қилган, шунингдек, тафсилотларни келтирмасдан «фуқаролар эвакуацияси»ни тилга олган.

Украина президенти Володимир Зеленский журналистлар билан мулоқотда Брянскка ҳужумни Киев уюштирганини тасдиқлаган. «Бош қўмондон Сирский менга қўнғироқ қилди ва ҳозиргина амалга оширилган муваффақиятли амалиёт ҳақида сўзлаб берди. Брянскдаги заводга аниқ зарба берилган», – деган у.

Зеленскийнинг изоҳлашича, гап Россия ракеталари учун электроника ва бутловчи қисмлар ишлаб чиқарадиган завод ҳақида кетмоқда. «Айнан шаҳарларимизга, қишлоқларимизга, фуқароларга ҳужум қилаётганларга [зарба берилди]. Биз ҳимояланяпмиз», – дея қўшимча қилган Украина президент.

Украина қуролли кучлари бош штаби зарба акс этган видеони эълон қилган. Украин ҳарбийлари аниқлик киритишича, Storm Shadow ракеталари билан йўлланган бу зарбалар «Кремний Эл» микроэлектроника заводи бўйлаб берилган. Украина қуролли кучлари изоҳига кўра, заводга Россиянинг «ҳарбий-иқтисодий салоҳияти»ни пасайтириш мақсадида ҳужум қилинган.

Хабарда «нишонга аниқ зарба берилгани ва ишлаб чиқариш қувватларига жиддий зарар етказилгани» қўшимча қилинган. Зарар кўлами аниқлаштирилмоқда.

Украина қуролли кучлари бу ҳужумда қанча ракетадан фойдалангани маълум қилинмаган. Видеода завод ҳудудида беш марта портлаш бўлганини кўриш мумкин.

Россия ва Украинадаги ҳарбий мавзуга ихтисослашган телеграм-каналлар украин ҳарбийларининг ҳужуми вақтида ва зарбалардан кейин Брянскда яшовчилар томонидан олинган бир неча видеоларни тарқатган. Улардан айримларида уйлар шикастлангани ва машиналар ёниб кетганини ҳам кўриш мумкин. Хабарларда айтилишича, ракеталардан бири турар жой биносига урилган. Видеолардан бирининг муаллифи зарбадан кейин маҳаллий аҳоли вакилларидан бирининг «қўли узилиб кетгани»ни айтган. «Медуза» таҳлилига кўра, бу видео заводдан тахминан 150 метр масофада олинган.

Astra нашрига кўра, ракеталардан бири заводнинг йиғиш цехига тушган. Шунингдек, корхона билан ёнма-ён жойлашган Брянск бизнес ва бошқарув техникуми биноси ҳам зарба остида қолган.

Зарба пайти Брянскда яшовчилардан бирининг автомобили видеорегистратори камерасига муҳрланган. Кадрларда ракеталардан бири заводдан бир неча юз метр узоқликдаги йўлга тушганини кўриш мумкин. Шундан кейин машина бу ердан шошилинч тарзда кета бошлайди, камера эса яна бир ракета зарбасини тасвирга олади – у ҳам корхонадан бир неча юз метр масофада, йўлдан янада узоқроқда портлаган.

Нашрнинг эътибор қаратишича, маҳаллий аҳоли вакиллари чатларда цехда жиддий вайронагарчиликлар юзага келгани, вайроналар остида одамлар кўплигини ёзмоқда. Маълум қилинишича, корхонанинг маъмурий биносига ҳам зарба берилган. Вайроналар остида одамлар қолаётгани ҳақидаги маълумотлар расман тасдиқланмаган.

«Кремний Эл» – Россиядаги энг йирик микроэлектроника корхоналаридан бири ҳисобланади. Унинг маҳсулотларидан ҳарбий саноатда ҳам фойдаланилади: заводда ишлаб чиқарилган чиплар ракета комплекслари ва дронлар учун қўлланади. Заводга олдин ҳам бир неча бор украин дронлари томонидан ҳужум уюштирилганди: 2023 йил август ва сентябр ойларида, шунингдек, 2024 йил октябрида. 2025 йил январида эса навбатдаги ҳужумдан кейин завод фаолияти тўхтатилганди.