Британиялик тарихчи: учинчи жаҳон уруши аллақачон бошланган бўлиши мумкин

Daily Mail хабар беришича, Глис жаҳон уруши аллақачон бошланган бўлиши мумкинлигини кўрсатувчи учта асосий белгини ажратган. Унинг айтишича, биринчи белги — «танлов асосидаги уруш»дир. Бундай ҳолатда давлатлар ҳарбий можарони ўзини ҳимоя қилиш учун эмас, балки икки етакчининг атайлаб қабул қилган қарори асосида бошлайди.

Яна бир мезон сифатида у «куч ҳал қилади», деб ҳисоблайдиган сиёсатчилар позициясини келтирди, ҳатто бунинг учун халқаро ҳуқуқни эътиборсиз қолдиришга тўғри келса ҳам.

Учинчи омил сифатида Глис урушни тезроқ тўхтатиш йўлини излаш ўрнига, қон тўкилишни давом эттириш истагини тилга олди.

Профессор Иккинчи жаҳон урушини ҳам эслади. Унинг сўзларига кўра, Япония 1941 йилда Ҳавайидаги Перл-Харборга ҳужум қилишга қарор қилганидан кейин уруш глобал тус олган. Шундан сўнг Адолф Ҳитлер АҚШга уруш эълон қилган.

Глис таъкидлашича, ҳозирги вазиятни Россия гўёки Эронга АҚШ кучларининг жойлашуви ҳақида разведка маълумотларини етказиб бера бошлагани тўғрисидаги хабарлар янада кескинлаштирган. Шунингдек, профессор Россия ва Хитой Эроннинг иқтисодий ҳамкорлари эканини ҳам эслатди.

Ҳар икки давлат АҚШ ва Исроил ҳужумларини очиқчасига қоралади, шунингдек, бу ҳолат минтақадаги жанговар ҳаракатлар кўламини кенгайишига олиб келиши мумкинлигидан огоҳлантирди.

Глиснинг фикрича, Трамп ўз ғалабасини эълон қилиш орқали жанговар ҳаракатларни тўхтатиши мумкин. Бироқ у хавотир билдиришича, Трамп “абадий урушлар”га ўрганиб қолган Нетаняҳу тузоғига тушиб қолиш хавфига эга.

Трамп аллақачон Эрон ҳарбий кучларининг салмоқли қисмидан маҳрум бўлгани сабабли уруш деярли якунланганини айтган. Аммо Глис бу ҳолатда бошқа давлатлар ҳам ўзларининг “танлов асосидаги урушлари”ни бошлаши мумкинлигини истисно қилмади.