«Пахтакор» суперкубокдаги ҳакамлик юзасидан шикоят киритди

Ўйиннинг иккинчи бўлимида, ҳисоб 0:1 бўлиб турганида Ибрагимовнинг зарбасидан сўнг тўп жарима майдони ичида «Нефтчи» футболчисининг қўлига теккан.

Фото: Видеодан кадр

Тошкентнинг «Пахтакор» клуби Ўзбекистон суперкубоги учун финалда Фарғонанинг «Нефтчи» клубига қарши ўйиндаги мағубиятдан сўнг ўйиндаги ҳакамлик устидан шикоят киритди.

«ЎзПФЛ регламентига биноан жамоамиз Ўзбекистон суперкубогидаги ҳакамлик устидан шикоят киритиш ҳуқуқидан фойдаланганини маълум қилади.

Баҳснинг 51-дақиқасида Иброҳим Ибрагимов берган зарбадан кейин рақиб ҳимоячиси (Боян Цигер) тўпни қўли билан қайтарди. Бу ҳолатда унинг қўли нотабиий ҳолатда – тана ҳажмини кенгайтириш учун турганди. Бироқ на бош ҳакам, на VAR ҳакамлари бу вазиятда тўп қўл билан ўйналганини кўришмади. Такрорий лавҳаларда эса қўлнинг танадан максимал нотабиий равишда чўзилганини кўриш мумкин», – дейилади клуб матбуот хизмати хабарида.

Шунингдек, сўнгги йилларда шунга ўхшаш вазиятларда «Пахтакор» дарвозасига белгиланган 4 пеналтига оид скриншотлар келтирилган.

«Пахтакор» футбол клуби барча ёшдаги миллий жамоаларга энг кўп номзодларни етказиб берганлиги билан фахрланади. Илк бор жаҳон чемпионати ва Олимпия ўйинлари финал босқичи йўлланмаси қўлга киритилишида ҳам жамоамиз тарбияланувчилари ҳамда футболчиларининг ўрни беқиёс бўлган. Умид қиламизки, футболимизда адолат бор ва ҳакамлар мавсум давомида беллашувларни одилона бошқариб боришади. Вазият «Пахтакор» футбол клубининг ҳафсаласини пир бўлишигача етиб бормаган.

Биз нафақат жамоамиз, балки Суперлига, Пролига ва биринчи лига учрашувларининг барчасида адолатли ҳакамлик бўлишини хоҳлаймиз. Чунки ўзбек футболини янада ривожлантириш учун ҳамиша ҳалол ва адолатли ўйинлар зарур деб ҳисоблаймиз», – дейилади клуб баёнотида.

Маълумот учун, ўйинда Темур Тўхтасинов бошчилигидаги ҳакамлар бригадаси ишлади.