АҚШ Ҳўрмуз бўғози бўйича янги резолюция лойиҳасини тақдим этди

АҚШ БМТ Хавфсизлик Кенгашининг Ҳўрмуз бўғози бўйича янги резолюция лойиҳасини тақдим этди, унда Эрондан «ҳужумларни, миналаштиришни ва йиғимларни тўхтатиш» талаби мавжуд. Резолюция матни АҚШ Давлат департаменти сайтида эълон қилинди.

АҚШ давлат котиби Марко Рубионинг айтишича, лойиҳа президент Доналд Трамп топшириғига биноан ишлаб чиқилган. Кемаларга ҳужумларни тўхтатишдан ташқари, Вашингтон Теҳрондан денгизда ўрнатилган миналарининг аниқ жойлашувини ошкор қилишни ва уларни олиб ташлашга ёрдам беришни, шунингдек, минтақада гуманитар йўлак яратишни қўллаб-қувватлашни талаб қилмоқда.

Ҳужжатга Баҳрайн, Саудия Арабистони, БАА, Қувайт ва Қатар ҳаммуаллифлик қилди. АҚШ яқин кунларда резолюция бўйича овоз бериш жараёнини кутмоқда. Марко Рубио Россия ва Хитойни ҳужжатни қўллаб-қувватлашга чақирди.

Апрель ойи бошида Баҳрайн БМТ Хавфсизлик Кенгашининг Ҳўрмуз бўғози бўйича резолюцияси лойиҳасини тайёрлади. У куч ишлатишга рухсат беришни назарда тутган ва Россия, Хитой ва Франция томонидан блокланган. 7 апрель куни Россия ва Хитой ҳужжатни қабул қилишга вето қўйди.

4 май куни Эрон 8 апрелда эълон қилинган ўт очишни тўхтатиш режими бошланганидан бери биринчи марта Ҳўрмуз бўғози орқали ўтаётган Америка эсминецлари ва савдо кемаларига ҳужум қилишга уринди. Шунингдек, БАА энергетика объектларига ҳам ҳужум уюштирилди.