Оролқумда 2 млн гектарлик ўрмон яратилади

Ўзбекистон Орол денгизининг қуриб қолган тубида кенг кўламли кўкаламзорлаштириш ишларини давом эттирмоқда. Лойиҳа доирасида Оролқум ҳудудида 2 миллион гектардан ортиқ майдонда ўрмон барпо этиш режалаштирилган.

Испаниянинг нуфузли OkDiario нашрида Ўзбекистоннинг Орол ҳудудини тиклашга қаратилган экологик дастурлари ҳақида мақола эълон қилинди.

Нашр таъкидлашича, Ўзбекистон ҳукумати халқаро ҳамжамият билан ҳамкорликда Орол денгизи ҳудудини қайта тиклаш бўйича кенг қамровли экологик лойиҳаларни амалга оширмоқда. Илгари дунёдаги тўртинчи йирик кўллардан бири бўлган Орол денгизи ҳозир қуриб қолган ва экологик жиҳатдан заиф ҳудудга айланган.

Мақолада қайд этилишича, совет даврида Амударё ва Сирдарё сувларининг пахта майдонларини суғориш учун бурилиши Орол инқирозига сабаб бўлган. Натижада денгиз суви қарийб 90 фоизга қисқариб, унинг ўрнида Оролқум чўли шаклланган.

Ҳозирги кунда Ўзбекистон собиқ денгиз тубида ўрмонлар барпо этиш орқали чанг ва шўр тарқалишини камайтириш, тупроқни мустаҳкамлаш ҳамда иқлим ўзгаришларининг салбий таъсирини юмшатишга ҳаракат қилмоқда.

Лойиҳада Қорақалпоқ давлат университети талабалари ҳам иштирок этмоқда. Улар қуриб қолган ҳудудларда дарахт экиш ишларига жалб қилинган.

Мутахассислар фикрича, ўрмонлаштириш ер деградацияси ва чўлланишга қарши энг самарали усуллардан бири ҳисобланади. Шунингдек, яшил ҳудудларни кенгайтириш чанг бўронларини камайтириш ва биологик хилма-хилликни тиклашга ёрдам беради.

Мақолада таъкидланишича, Ўзбекистоннинг ушбу ташаббуси халқаро экологик ҳамкорликни ҳам кучайтирмоқда. Хусусан, Қозоғистон билан биргаликда Орол денгизининг шимолий қисмини тиклаш бўйича қўшма лойиҳалар амалга оширилмоқда.