Путин Белгород ва Брянск раҳбарларини лавозимдан олди

Россия президенти Владимир Путин 13 май куни Белгород ва Брянск вилоятлари губернаторлари — Вячеслав Гладков ҳамда Александр Богомазнинг истеъфосини қабул қилди. Расмий маълумотга кўра, улар лавозимини “ўз хоҳишига кўра” тарк этган.

Фото: iStock

Белгород вилояти раҳбари вазифасини вақтинча бажарувчи этиб Александр Шуваев тайинланди. У Украинага қарши урушда иштирок этган ва 2025 йил июнида уруш қатнашчиларидан янги бошқарув кадрларини тайёрлашга қаратилган “Время героев” давлат дастури иштирокчиси бўлган. Шу йил январь ойида эса Иркутск вилояти губернатори ўринбосари лавозимига келган.

Брянск вилояти раҳбари вазифасини вақтинча бажариш Егор Ковальчукка топширилди. У Россия президенти ҳузуридаги давлат хизмати академиясининг (“губернаторлар мактаби” деб аталади) битирувчиси ҳисобланади. Ковальчук 2019–2022 йилларда Челябинск вилояти губернатори ўринбосари бўлиб ишлаган. 2024 йилда эса Россия босиб олган Украина ҳудудида ташкил этилган ўзини “Луханск халқ республикаси” деб атаётган тузилманинг “ҳукумат раҳбари” этиб тайинланган.

Россия ОАВ маълумотларига кўра, лавозимидан кетган Вячеслав Гладков иқтисодий ривожланиш вазири ўринбосари ёки қисман тан олинган Абхазияда Россия элчиси бўлиши мумкин. Александр Богомаз эса “Единая Россия” партиясидан Давлат думаси депутати бўлиши эҳтимоли айтилмоқда.

Белгород ва Брянск вилоятлари Россиянинг Украинага қарши тўлиқ масштабли уруши давомида бир неча бор ҳужумларга учраган.

Белгород вилоятида 2026 йил январь ва февраль ойларидаги зарбалар ортидан йирик электр узилишлари кузатилган. Март ойида эса шаҳар кучли ракета ҳужумига дуч келган. Гладков маълумотига кўра, уруш бошланганидан бери вилоятда 320 киши ҳалок бўлган, 2,5 минг киши яраланган.

Брянск вилояти ҳам бир неча бор дрон ҳужумларига учраган. Хусусан, 2024 йил декабрида дрон зарбаси оқибатида нефть қувурига тегишли объектда ёнғин чиққан. ASTRA Telegram-канали бу “Дружба” нефть қувурининг қуйиш пункти бўлганини хабар қилган.

2024 йил декабрида Путин Украина билан чегарадош яна бир ҳудуд — Курск вилояти раҳбарини ҳам алмаштирган эди. Алексей Смирнов ўрнига Александр Хинштейн тайинланган. ОАВ маълумотларига кўра, Кремль Украина Қуролли кучларининг ҳужуми вақтида Смирновнинг ҳаракатларидан норози бўлган.