Эронга зарба берган АҚШ ва мигрантлар учун божларни ошираётган Россия – кун дайжести

Ўтган кун давомида жаҳонда рўй берган энг асосий воқеа ва янгиликлар шарҳи билан кундалик хабарномада таништирамиз.

АҚШ Эронга зарбалар берди

АҚШ кучлари Эрон жанубида миналар ўрнатишга уринаётган қайиқлар ва ракета учириш майдонларига зарбалар берганини маълум қилди. АҚШ Марказий қўмондонлиги буни «мудофаа ҳаракатлари» деб баҳоламоқда.

Марказий қўмондонлик баёнотида «қўшинларни Эрон кучлари томонидан юзага келаётган таҳдидлардан ҳимоя қилиш» мақсадида янги зарбалар берилгани айтилган.

Шунингдек, 25 май куни Эрон янги ҳаво мудофааси тизими ёрдамида «душманона» кўринмас дронни уриб туширганини маълум қилди. Бироқ дроннинг қаердан учиб келгани очиқланмаган.

«Бу ҳеч қандай кўринмас дрон – энди Форс кўрфази осмонига кира олмаслигининг белгисидир», дея Фарс агентлиги исмини ошкор қилмаган расмийдан иқтибос келтирди.

Минтақадаги кескинликнинг яна бир далили сифатида бош вазир Бинямин Нетаняҳу Исроил «Ҳизбуллоҳ»га қарши зарбаларни кучайтиришини айтди. Кўп ўтмай Исроил ҳарбийлари Ливаннинг шарқий Бека водийси ва бошқа ҳудудларга ҳужум қилаётганини маълум қилди.

АҚШнинг мазкур зарбалари – Эрон бош музокарачиси ва ташқи ишлар вазири Аббос Ароқчи Доҳада Қатар бош вазири билан эҳтимолий келишувни муҳокама қилаётган вақтда содир бўлди.

Доҳадаги музокаралар асосан Ҳўрмуз бўғози ва Эроннинг юқори даражада бойитилган уран захираларига қаратилган. Шу билан бирга, якуний келишув доирасида музлатилган маблағларни муҳокама қилиш учун музокараларда Эрон Марказий банки раиси ҳам иштирок этган.

Шу кунларда АҚШ президенти Доналд Трамп кўпроқ араб ва мусулмон давлатларини Исроил билан алоқаларни нормаллаштиришга қаратилган «Иброҳим келишувлари»ни имзолашга чақирмоқда. У Саудия Арабистони ва Қатар буни зудлик билан имзолаши кераклигини, Покистон, Миср, Иордания ва Туркия ҳам улардан ўрнак олиши лозимлигини айтиб, ўзининг бу талабини мажбурий деб атади.

Нетаняҳу идораси ва араб етакчилари Трампнинг бу талаблари бўйича ҳозирча изоҳ бермади.

Россия Киевга янги зарбалар бермоқчи

Россия Киевга, жумладан, «қарор қабул қилиш марказлари» ва «қўмондонлик пунктлари»га янги зарбалар беришни режалаштирмоқда. Бу ҳақда баёнот берган Россия ташқи ишлар вазирлиги яна бир бор чет эл фуқаролари ҳамда дипломатларни шаҳарни тарк этишга чақирди.

«Россия Қуролли Кучлари Киевдаги Украина ҳарбий-саноат мажмуаси корхоналарига, жумладан, дронларни лойиҳалаш, ишлаб чиқариш, дастурлаш ва улардан фойдаланишга тайёрлашнинг аниқ жойларига кетма-кет тизимли зарбалар беришга киришмоқда», дейилади баёнотда.

«Юқорида қайд этилган объектлар бутун Киев бўйлаб тарқалгани сабабли» Москва чет элликларни, дипломатик миссиялар ходимларини шаҳардан «имкон қадар тезроқ» чиқиб кетишга чақирди.

Украина пойтахти аҳолиси эса «ҳарбий ва маъмурий инфратузилма объектларига яқинлашмасликка» чақирилди.

Аввалроқ расмий Москва 22 майга ўтар кечаси Украинани Луҳанскдаги коллеж биноси ва ётоқхонасига ҳужум қилишда айблаган эди. ТИВнинг таъкидлашича, ушбу ҳужум Кремлнинг «сабр косасини тўлдирган».

Бунга жавобан 24 майга ўтар кечаси Россия қўшинлари Украинага қарши жами 90 та ракета ва 600 та дрон билан зарбалар берганди.

Угандада ҳам Эбола вируси кўпаймоқда

Уганда соғлиқни сақлаш вазирлиги Эболанинг иккита янги ҳолати ҳақида хабар берди. Бу билан ушбу мамлакатда умумий касалланганлар сони 7 тага етди.

Вазирлик баёнотида айтилишича, янги касалланган икки киши пойтахт Кампаладаги хусусий тиббиёт муассасаси ходимларидир.

«Ҳар иккала бемор махсус ажратилган даволаш бўлимига ётқизилди ва айни пайтда уларга тиббий ёрдам кўрсатилмоқда», дейилади хабарда. Шунингдек, мутахассислар гуруҳи ушбу шахслар билан мулоқотда бўлган барча инсонларни аниқлаш ва назоратга олиш ишларини олиб бормоқда.

Угандадаги ҳолатлар қўшни Конгодаги эпидемия билан боғлиқ. ЖССТга кўра, Конгода 900 дан ортиқ касалланиш ҳолати қайд этилган. Шунингдек, 200 дан ортиқ киши Эбола вирусидан вафот этгани тахмин қилинмоқда.

15 май куни Эбола вирусининг «Bundibugyo» штамми келтириб чиқарган эпидемия ҳақида эълон қилинганди. Ҳозирда ушбу штаммга қарши тасдиқланган вакциналар ёки махсус даволаш усуллари мавжуд эмас.

Саудияда Ҳаж зиёрати бошланди

Эрон уруши сабабли чуқур ларзага келган минтақадаги вазият фонида Саудия Арабистонида Ҳаж зиёрати бошланди. Саудия расмийларининг маълум қилишича, қиролликка хориждан қарийб 1,51 миллион зиёратчи етиб келган. Бу минтақадаги хавотирларга қарамай, ўтган йилгига нисбатан 11 минг кишига кўпдир.

Саудия Арабистони ҳам Форс кўрфазидаги қўшнилари каби уруш давомида ракета ва дронлар ҳужумига учраганди.

Қироллик мудофаа вазирлиги ўтган ҳафтада ижтимоий тармоқларда муқаддас Макка шаҳри чеккасида жойлашган ҳаво мудофаа батареялари акс этган видеони жойлаштирди.

«Ҳаво мудофааси кучлари муқаддас қадамжолар осмонини ҳимоя қилиш ва барча ҳаво таҳдидларига қарши курашиш, меҳмонларнинг хавфсизлиги ва хотиржамлигини таъминлаш учун жавобгардир», дейилади вазирлик хабарида.

Ҳаж зиёрати май ойи охирида якунланади ва зиёратчилар навбат билан қиролликни тарк этади.

Россия мигрантлар учун божларни оширмоқчи

Россия Давлат Думаси келаси ҳафта чет эл фуқаролари учун давлат божларини бир неча баробар ошириш бўйича қонун лойиҳаларини кўриб чиқади.

Қуйи палата спикери Вячеслав Володиннинг маълум қилишича, Россия фуқаролигини олиш учун тўлов 12 баравар — 4 200 рублдан 50 минг рублгача ошади. Вақтинча яшаш учун рухсатнома 8 баравар — 1920 рублдан 15 минг рублгача, яшаш гувоҳномаси эса 5 баравар — 6 мингдан 30 минг рублгача қимматлайди.

Бундан ташқари, хорижий ишчиларга ёллашга рухсатнома бериш учун бож ҳам 15 минг рублгача ошиши мумкин.

Янги божлар туфайли Россия федерал ғазнасига йилига 15 миллиард рублгача тушумлар ошиши айтилмоқда. Володиннинг сўзларига кўра, қонун лойиҳалари миграция соҳасида «тартиб ўрнатишга ёрдам беради».

Россияда сўнгги йилларда мигрантларга нисбатан ксенофобик кайфият кучайди. Мигрантлар ишлайдиган соҳалар торайтирилмоқда, назорат кучайтирилмоқда. Украинада босқинчилик уруши ортидан минглаб мигрантлар урушга юборилмоқда.