Тошкентда автобусда аёлга жинсий аъзосини кўрсатиб, шилқимлик қилган эркак 15 суткага қамалди

Тошкент шаҳридаги автобус ичида аёлга шилқимлик қилган эркак маъмурий жазога тортилди. Kun.uz суд қарори билан танишди.

Суд ҳужжатига кўра, 50 ёшли Т.С. 23 июн куни эрталаб 93-сонли йўналишда ҳаракатланадиган автобусга минган. У автобус ичида ёнида ўтирган аёлга жинсий аъзосини кўрсатиб, шаҳвоний шилқимлик қилган.Қўрқиб кетган аёл бақириб, ҳайдовчидан ёрдам сўрагач, эркак автобусдан тушиб кетишга уринган. Аммо ҳайдовчи эшикларни очмаган.

Т.С. судда айбига иқрорлик билдирган. У маст ҳолатда бўлгани учун уятли ҳаракатлар қилганини эслай олмаслигини, ички ишлар биносига олиб келишганидан кейин ўзини англай бошлаганини айтган.

Жабрланувчи ўз кўрсатмасида шундай деган:

“23 июн куни соат 7:45 ларда автобусда менга нотаниш эркак ёнимга келиб ўтирди ва қўли билан қўлимга тегинди. Шунда ўзимни ундан узоқлаштириш учун чеккароқ сурилдим. Кейин Т.С. ўзининг жинсий аъзосини кўрсатди. Қўрқиб бақириб юбордим, ҳайдовчидан ёрдам сўрадим. Т.С. қочиб, автобусдан тушиб кетмоқчи бўлди, лекин ҳайдовчи эшикларни очмади. Шунда Т.С. ҳайдовчини уятли сўзлар билан сўкиб, автобус эшикларини очишга уринди. Лекин қочиб кетолмади. Шундан сўнг воқеа жойига ички ишлар ходимлари келди”.

Аёл суддан ҳуқуқбузарга нисбатан чора кўришни сўраган. 

ЖИБ Бектемир судининг қарори билан Т.С. МЖтКнинг 41-1-моддаси (шаҳвоний шилқимлик қилиш) 1-қисми, 183-моддаси (майда безорилик) ҳамда 194-моддаси (ички ишлар органлари ходимининг қонуний талабларини бажармаслик) 1-қисмида назарда тутилган ҳуқуқбузарликларни содир этишда айбли деб топилди. Унга 15 сутка маъмурий қамоққа жазоси тайинланган.

Аввалроқ Тошкентда амалиётчи талаба қизларга шилқимлик қилган шифокор 5 суткага қамалганди.