Реконструкция ва кенгайтириш ишлари якунланиши муносабати билан «Чинор» метро бекати 29 июл куни соат 05:00 дан бошлаб йўловчилар учун тўлиқ фаолиятини қайта бошлайди. Бу ҳақда Тошкент метрополитени ахборот хизмати хабар берди.
«Реконструкция жараёнида бекатнинг кириш ва чиқиш қисмлари сезиларли даражада кенгайтирилди. Хусусан, аввал 6 та бўлган турникетлар сони 13 тага етказилди. Шунингдек, йўловчилар учун ноқулайлик туғдириб келган ўтиш йўлаклари қайта лойиҳалаштирилиб, бекатдан бекатга тўғридан тўғри ўтиш имконияти яратилди. Бекат авваллари кун давомида ўртача 15 минг нафар йўловчига хизмат кўрсатган бўлса, эндиликда кунига 35–40 минг нафаргача йўловчига сифатли хизмат кўрсатиш имкониятига эга бўлди», дейилади метрополитен хабарида.
Аввалроқ, 13 июндан бошлаб 50 кун давомида «Чинор» бекатида таъмирлаш ишлари амалга оширилиши хабар қилинганди.
