CENTCOM маълумотига кўра, 29 июлга ўтар кечаси Эрон Ислом инқилоби муҳофизлари корпуси Эрон ҳудудидан Яқин Шарқдаги АҚШ ҳарбий кучларига қарши бир нечта баллистик ракета учирган. Америка ҳарбийлари буни “кутилмаган ҳужумга уриниш” деб атади.
Қўмондонлик тарқатган маълумотда барча ракеталар ҳавода йўқ қилингани қайд этилган. Шунингдек, минтақадаги АҚШ қўшинлари юқори жанговар шайлик ҳолатида қолиши ва вазиятни диққат билан кузатаётгани билдирилган.
Бундан аввал Axios нашри журналисти Барак Равид ўз манбаларига таяниб, Эрон Иорданияда жойлашган АҚШ ҳарбий базасига ракета зарбалари берганини хабар қилган эди. Унинг таъкидлашича, бу Доналд Трамп Эронга қарши ҳужумларни вақтинча тўхтатишга қарор қилганидан кейин Теҳрон томонидан АҚШ базасига амалга оширилган илк ракета ҳужуми ҳисобланади.
12–24 июл кунлари АҚШ Эрон ҳудудидаги ҳарбий объектларга тунги авиация зарбаларини амалга оширган эди. Вашингтон бу амалиётлардан кўзланган мақсад Ҳўрмуз бўғозидаги тижорат кемалари хавфсизлигига таҳдид солаётган Эрон имкониятларини чеклаш эканини билдирган.
АҚШ маълумотларига кўра, корпус Вашингтон ва Теҳрон ўртасидаги рамкавий тинчлик келишуви шартларига қарамай, Ҳўрмуз бўғозидаги танкерларга бир неча бор ҳужум қилган. Шунингдек, Эрон қўшни давлатлар ҳудудига ҳам зарбалар бериб, нишон АҚШ ҳарбий базалари эканини маълум қилган.
21 июл куни Доналд Трамп америкалик ҳарбийлар ҳалок бўлгани учун Эронни “бир неча баробар қаттиқроқ жавоб” кутаётгани ҳақида огоҳлантирган эди. Янги кескинлашув бошланганидан бери CENTCOM уч нафар америкалик ҳарбийнинг ҳалок бўлганини маълум қилган.
24 июлдан кейин томонлар бир неча кун давомида ўзаро ҳужумлардан тийилиб турган эди. The New York Times маълумотига кўра, шу куни Доналд Трамп ўзининг юқори лавозимли маслаҳатчилари билан учрашиб, Эронга қарши навбатдаги кенг кўламли ҳужумларни кечиктиришга қарор қилган. Газета бу қарорга ҳаво ҳужумидан мудофаа тизимлари, жумладан Patriot мажмуалари учун ракета-қўлга туширгичлар захираси камайиши эҳтимоли, шунингдек, жаҳон энергетика ва иқтисодий инқирози хавфи сабаб бўлганини қайд этган.
