Ўзбекистон Жаҳон савдо ташкилотига 2026 йилда қўшилиш мақсадини яна бир бор тасдиқлади, Фарғонада маст ҳайдовчи уриб кетган ЙПХ ходими ҳалок бўлди, Қорақалпоғистонда эса қиймати 1 миллиард сўмлик газбаллонлар талон-торож қилингани аниқланди. Шу ва бошқа муҳим маҳаллий янгиликлар билан Kun.uz дайжестида таништирамиз.
Ўзбекистон ЖСТга 2026 йилда қўшилиш мақсадини тасдиқлади
Ўзбекистон Жаҳон савдо ташкилотига аъзо бўлиш жараёнини 2026 йилда якунлаш режаси ўз кучида қолишини маълум қилди.
ЖСТ Ишчи гуруҳининг навбатдаги йиғилишида мамлакат томонидан қабул қилинган 190 та норматив-ҳуқуқий ҳужжат, икки томонлама музокаралар ва амалга оширилаётган иқтисодий ислоҳотлар муҳокама қилинди.
Маълум қилинишича, ҳозирга қадар Ўзбекистон 31 та бозорга кириш бўйича икки томонлама келишув имзолаган. ЖСТ раҳбарияти музокаралардаги илгарилашни ижобий баҳолади.
Маст ҳайдовчи ЙПХ ходимининг ўлимига сабаб бўлди
Фарғона вилоятининг Ўзбекистон туманида хизмат вазифасини бажараётган ЙПХ инспектори Ҳайитбек Каримжонов автомобил уриб кетиши оқибатида ҳалок бўлди.
Ҳодиса 31 июл куни кечаси содир бўлган. Гувоҳлар Spark ҳайдовчиси маст ҳолатда бўлгани ва тўхташ ишорасига бўйсунмасдан қочганини айтмоқда.
Ҳолат юзасидан тергов ҳаракатлари олиб борилмоқда.
1067 та газбаллон талон-торож қилинди
Қорақалпоғистон Республикасининг Тахтакўпир туманида қиймати 1 миллиард сўмлик 1067 дона суюлтирилган газбаллон талон-торож қилингани аниқланди.
Тергов маълумотларига кўра, газбаллонлар «Тахтакўпиртумангаз» таъминоти бўлими моддий жавобгар шахслари томонидан ўзлаштирилган.
Ҳолат юзасидан Жиноят кодексининг 167-моддаси, яъни ўзлаштириш ёки растрата йўли билан талон-торож қилиш билан жиноят иши қўзғатилиб, тергов ҳаракатлари олиб борилмоқда.
Чехияга ишга юбориш учун ҳамширалар ўқитилади
Навбатда меҳнат миграцияси соҳасига оид янгилик. Ўзбекистон ва Чехия тиббиёт ходимларини тартибга солинган меҳнат миграцияси асосида ишга жойлаштириш бўйича ҳамкорликни кенгайтиришни режалаштирмоқда.
Шу мақсадда Чехияда ишлаш истагидаги ўзбекистонлик ҳамширалар учун мамлакатимизда махсус ўқув курсларини ташкил этиш имконияти кўриб чиқилмоқда.
Томонлар малакали мутахассисларни Чехияга қонуний ва тартибли ишга жойлаштириш ҳамда бу соҳадаги ҳамкорликни ривожлантириш масалаларини муҳокама қилди.
Нукусда янги энергия тизими ишга туширилади
Президент қарорига мувофиқ, Нукус шаҳридаги «РК-1» қозонхонаси давлат-хусусий шериклик асосида когенерация технологиялари билан модернизация қилинади.
Лойиҳа доирасида бир вақтнинг ўзида электр ва иссиқлик энергияси ишлаб чиқариш йўлга қўйилади. Бу энергия тежамкорлигини ошириш, табиий газ сарфини камайтириш ва иссиқлик таъминоти сифатини яхшилашга хизмат қилади.
Шунингдек, 28 километр иссиқлик тармоқлари қурилиб, минглаб аҳоли барқарор электр ва марказлашган иссиқлик таъминоти билан қамраб олинади.
Имтиҳонга келмаган талабгорлар пулини қайтариб олиши мумкин
Билим ва малакаларни баҳолаш агентлиги миллий сертификат имтиҳонларида иштирок эта олмаган талабгорлар учун янги тартибни жорий қилди.
Энди узрли сабаб билан имтиҳонга келмаганлар тўлаган маблағини қайтариб олиши ёки кейинги имтиҳонда қўшимча тўловсиз иштирок этиши мумкин.
Бу имконият касаллик, хизмат сафари ёки яқин қариндошининг вафоти каби ҳолатларда қўлланади. Узрсиз келмаган ёки имтиҳон қоидаларини бузган талабгорлар эса ушбу тартибдан фойдалана олмайди.
Таълим муассасаларида хавфсизлик чоралари кучайтирилади
Вазирлар Маҳкамаси қарори билан мактаблар, олийгоҳлар ва бошқа таълим муассасаларида хавфсизлик тизимини такомиллаштириш бўйича янги тартиб тасдиқланди.
Унга кўра, муассасаларда видеокузатув, кириш-чиқишни назорат қилиш, ёнғин хавфсизлиги ва фавқулодда вазиятларда ҳаракат қилиш тизимлари босқичма-босқич модернизация қилинади.
Шунингдек, қўриқлаш хизмати ходимларининг малакаси оширилиб, ахборот тизимлари «Хавфсиз таълим» платформаси билан интеграция қилинади.
Ҳайвонларга шафқатсизлик учун жазо оғирлашди
Президент администрацияси раҳбари Саида Мирзиёева ҳайвонларга нисбатан шафқатсиз муносабат учун жавобгарлик кучайтирилганини эслатди.
Энди бундай ҳуқуқбузарлик учун маъмурий жарималар икки баравар оширилган, шунингдек, 15 суткагача маъмурий қамоқ жазоси ҳам қўлланиши мумкин. Такроран содир этилган ҳолатлар эса жиноий жавобгарликка сабаб бўлади.
Саида Мирзиёева бу каби қонунлар жамиятда меҳр-оқибат ва масъулиятли муносабатни шакллантиришга хизмат қилишини таъкидлади.
