Залужний ушбу фикрларни 3 август куни Киевда бўлиб ўтган Украина элчиларининг умумий йиғилишида билдирган. У ерда евроатлантик интеграция ва мамлакат хавфсизлиги масалалари муҳокама қилинган.
Музокаралар чоғида ундан Британия бошчилигидаги Бирлашган экспедицион кучлар (Joint Expeditionary Force – JEF) билан ҳамкорлик ҳақида сўралган. Жавоб давомида у Украинанинг НАТОга қўшилиш истиқболларига ҳам тўхталди.
«НАТОни жуда яхши биламан. Қарийб 12 йил давомида армиямизда НАТО стандартларини жорий этиш билан шахсан шуғулландим. Ҳар йили “яқин орада Украина НАТОга қабул қилинади“ деган ваъдаларни эшитардик. Афсуски, биз ҳеч қачон НАТОга кирмаймиз», — деди Залужний.
Унинг таъкидлашича, асосий муаммо Украина армиясининг ривожланиш даражаси эмас, балки НАТОнинг мавжуд ҳарбий ёндашувларидир. Залужний фикрича, алянс ҳали ҳам Иккинчи жаҳон уруши даврида шаклланган доктриналарга таянади ва яқин йилларда бу ёндашув кескин ўзгариши эҳтимоли паст.
Шу билан бирга, у Украинага НАТО мамлакатларида мавжуд замонавий ҳарбий технологиялар, айниқса, ҳаво ва ракета ҳужумидан мудофаа соҳасидаги имкониятлар ҳамон зарурлигини таъкидлади. Бу борада у Patriot каби ҳаво ҳужумидан мудофаа тизимларини мисол келтирди.
Залужнийнинг фикрича, Украина келажакда янги ташкил этилаётган ёки шаклланиш жараёнидаги Европа хавфсизлик тузилмаларига таяниши мумкин. У шундай тузилмалардан бири сифатида JEFʼни тилга олди.
JEF 2015 йилда Буюк Британия ташаббуси билан ташкил этилган бўлиб, унинг таркибига Дания, Финландия, Эстония, Исландия, Латвия, Литва, Нидерландия, Швеция ва Норвегия киради. Коалициянинг асосий мақсади Шимолий Европа, жумладан Болтиқ ва Арктика минтақаси хавфсизлигини таъминлашдан иборат.
2025 йил декабр ойида Украина JEFʼнинг кенгайтирилган шерик мақомини олган. Коалиция НАТО билан ҳамкорлик қилиб, Россиянинг денгиздаги фаолиятини тийиб туриш бўйича чораларни қўллаб-қувватлайди ҳамда Россиянинг «соя флоти»га қарши қатъий чоралар кўришга тайёрлигини билдирган.
Шу билан бирга, Залужний Украина ҳозирча JEFʼга тўлиқ аъзо бўлиш йўлида етарлича фаол ишламаётганини айтди. Унинг фикрича, мазкур коалициянинг бошқарув тизими ҳам ҳали тўлиқ шаклланмаган ва коллектив мудофаа бўйича НАТОдаги каби мажбуриятларни назарда тутмайди.
