Вакант ўринларга қабул бўйича абитуриентларни қизиқтираётган асосий саволларга жавоб берилди.
Кимлар вакант ўринларга ҳужжат топшира олади?
Кириш имтиҳонларида иштирок этиб, 56,7 ва ундан юқори балл тўплаган, аммо ўқишга кира олмаган абитуриентлар бўш қолган ўринлар учун ҳужжат топшириши мумкин.
Шунингдек, қабулнинг танлов босқичида олий таълим муассасаси ва таълим йўналишини танламаган абитуриентларга ҳам вакант ўринлар учун ариза бериш имконияти берилган.
5 тагача йўналиш танлаш мумкин
Абитуриент ўзининг фанлар мажмуасига мос таълим йўналишларида бўш ўринлар мавжуд бўлса, 5 тагача йўналиш ва олий таълим муассасасини танлаши мумкин.
Бунда кундузги, кечки ёки масофавий таълим шаклларидан бирини танлаш имконияти мавжуд.
Ариза қаердан берилади?
Вакант ўринлар учун ариза Билим ва малакаларни баҳолаш агентлигининг шахсий кабинети орқали топширилади.
Абитуриент шахсий кабинетидаги «Вакант ўринлар учун ариза бериш» бўлими орқали танловда иштирок этиши мумкин.
Грант эмас, базавий контракт асосида қабул қилинади
Вакант ўринлар учун рўйхатдан ўтган абитуриентлар тўплаган баллари кетма-кетлигига қатъий риоя қилинган ҳолда сараланади.
Танловдан муваффақиятли ўтганлар базавий тўлов-контракт асосида талабаликка тавсия этилади. Яъни ушбу вакант ўринларга қабул давлат гранти асосида эмас.
Аризалар 28 августгача қабул қилинади
Вакант ўринлар учун ариза бериш жараёни 22 августдан 28 августгача давом этади.
Қабул якунланганидан сўнг бир ҳафта ичида танлов натижалари — мандат эълон қилиниши белгиланган.
Нега айрим йўналишларда вакант ўрин йўқ?
Агар абитуриент танламоқчи бўлган йўналиш тизимда кўринмаса, бу йўналиш бўйича белгиланган қабул квотаси тўлган бўлиши мумкин.
Қўшимча қабул барча таълим йўналишларига эмас, фақат қабул параметрлари тўлмай қолган вакант ўринларга амалга оширилади.
