Эрон Ҳўрмуз бўғозидан ўтиш бўйича белгиланган қоидаларга риоя қилмаган кемаларга нисбатан чекловларни кучайтиришини маълум қилди.
23 август куни Эроннинг Форс кўрфази бўғозлари маъмурияти (PGSA) ижтимоий тармоқда тарқатган баёнотида қоидабузар кемалар кейинги сафар Ҳўрмуз бўғозидан ўтишда турли чекловларга дуч келиши мумкинлигини билдирди.
Жумладан, бундай кемаларга жарима солиш, уларни ушлаб туриш ва айрим ҳолларда мусодара қилиш чоралари қўлланиши мумкинлиги айтилган.
Эрон томони, шунингдек, Форс кўрфази акваториясига ёки ундан ташқарига юк ташиш билан шуғулланувчи компанияларни кемани ижарага олишдан олдин қоидабузарлар рўйхатини текширишга чақирди.
Тегишли интернет саҳифасида Теҳрон Ҳўрмуз бўғозидан ўтиш талабларини бузган деб ҳисоблаётган кемалар рўйхати ҳам эълон қилинган.
АҚШ махфий денгиз йўлагини ташкил этгани айтилмоқда
Аввалроқ, 19 август куни Axios нашри АҚШ Қуролли кучлари Ҳўрмуз бўғози орқали кемалар ҳаракатини таъминлаш учун махфий денгиз йўналишини ташкил этгани ҳақида хабар берган эди.
Нашр маълумотларига кўра, Уммон соҳиллари яқинидаги жанубий канал орқали ҳар кеча 15–20 та танкер ҳаракатланмоқда. Улар орқали жаҳон бозорига кунига қарийб 10 млн баррель нефт етказиб берилаётгани айтилган.
Бу урушдан олдин Ҳўрмуз бўғози орқали ташилган нефт ҳажмининг тахминан ярмига тенг.
Axios АҚШ президенти Доналд Трамп маъмурияти расмийларига таяниб, ушбу етказиб беришлар жаҳон нефт бозорига «сезиларли таъсир» кўрсатаётганини ёзган.
Трамп Эрон билан савдо қилувчи давлатларни санкциялар билан огоҳлантирган
Бундан аввал АҚШ президенти Доналд Трамп Эронга қарши кенг кўламли иқтисодий босим бошланганини эълон қилган эди.
У Теҳронни қўллаб-қувватлайдиган ёки Эрон билан бизнес алоқаларини давом эттирадиган ҳар қандай давлатга нисбатан катта миқдордаги санкциялар жорий қилиниши мумкинлигини айтган.
Трамп, шунингдек, айни пайтда Вашингтон ва Теҳрон ўртасида музокаралар олиб борилмаётганини таъкидлаган.
