АҚШ президенти Доналд Трамп 14 сентябр куни Truth Social ижтимоий тармоғида Россия ва Украина бир-бирининг энергетика инфратузилмасига зарба беришни тўхтатишга келишиб олганини билдирди.
Трамп қисқа баёнотида жаҳон бозорида дизел ёнилғиси нархининг ошишини ҳам асосан Россия ва Украина ўртасидаги уруш билан боғлади.
Бундан бир кун аввал АҚШ президенти Украина раҳбари Володимир Зеленскийни Россиянинг дизел ёнилғиси билан боғлиқ инфратузилмасига зарбаларни тўхтатишга чақирган эди.
«Зеленский жаноблари билан бу ҳақда гаплашдик. Бошқа кўплаб нишонлар бор. Россиядаги дизел ёнилғисига зарба беришни тўхтатишингиз керак. Бу бутун дунёга зарар етказмоқда», деган Трамп журналистлар билан суҳбатда.
Кейинроқ Зеленский Украина Россия энергетикасига зарба беришдан тийилишга тайёрлигини маълум қилди. Бироқ бунинг учун ҳамкорлар Россиянинг Украина электр энергетикаси, бошқа энергетика объектлари, муҳим инфратузилмаси ва озиқ-овқат таъминотига ҳужум қилмаслик ниятини амалда таъминлаши кераклигини айтди.
Украина президентининг таъкидлашича, Киев Москва ҳар қандай келишувга риоя қилишни исташига ҳозирча ишонч билдирмаяпти. Зеленский бундай келишувлар узоқ муддатли бўлиши ва одамлар ҳаётига реал таъсир кўрсатиши зарурлигини қайд этди.
У энергетика ва муҳим инфратузилмага зарбаларни тўхтатиш урушдаги кескинликни пасайтириш ва тинчликка эришиш йўлидаги биринчи қадам бўлиши мумкинлигини ҳам таъкидлади.
Россия томони Трампнинг икки давлат энергетика объектларига ўзаро зарба бермасликка келишгани ҳақидаги баёнотига ҳозирча расмий муносабат билдирмаган.
Россия 2026 йил ёзида ёнилғи бозорида жиддий танқисликка дуч келган. Бу ҳолат Украина дронларининг Россия нефтни қайта ишлаш заводлари ва ёнилғи-энергетика объектларига зарбалари кўпайгани фонида кузатилган.
Reuters манбалари маълумотига кўра, август охирига келиб Россияда бензин ишлаб чиқариш ҳажми ички истеъмолнинг қарийб 70 фоизи даражасига тушган.
Шу билан бирга, 30 август куни Россия Мудофаа вазирлиги Украина энергетика объектларига янги йирик зарбалар тайёрланаётганини маълум қилган эди.
