MEED нашри маълумотига кўра, Саудия Арабистони Давлат инвестиция жамғармаси — PIF ушбу лойиҳа юзасидан қурилиш компанияларига мурожаат қилган. Жараённи жамғарманинг шуъба корхонаси — Tower District Real Estate Development Company олиб бормоқда.
Бозорни ўрганиш жараёнига тажрибали халқаро пудратчилар ва Саудиянинг бир қатор йирик қурилиш компаниялари таклиф этилган. Бу босқич эҳтимолий ижрочиларнинг имкониятлари ва лойиҳага қизиқишини баҳолашга қаратилган.
Икки километрлик минора Ар-Риёд чеккасида барпо этилиши режалаштирилаётган янги марказий ишбилармонлик ҳудудининг асосий иншооти бўлади.
PIF 2025 йил июн ойида ушбу ҳудуд бўйича лойиҳани бошқариш ва маслаҳат хизматларини кўрсатишга қизиққан компаниялардан таклифлар олган. Мазкур шартнома минора қурилишини ҳам, унинг атрофидаги ишбилармонлик ҳудудини яратиш жараёнини ҳам бошқаришни қамраб олади.
Хабарга кўра, ушбу хизматлар бўйича тендерда иштирок этиш учун АҚШнинг Aecom, Jacobs, Parsons ва Turner, шунингдек, Британиянинг Mace компанияларига таклиф юборилган.
Лойиҳа меъмори сифатида Британиянинг Foster & Partners бюроси танланган. Бюро 2022 йил охирида эълон қилинган халқаро танловда ғолиб бўлган.
Режалаштирилаётган баландлик — 2 минг метр. Бу дунёдаги энг баланд бино ҳисобланган «Бурж Халифа» баландлигидан қарийб 2,4 баравар кўп. Минора Саудиянинг Жидда шаҳрида қурилаётган, баландлиги бир километрдан ошиши кўзда тутилган осмонўпар бинодан ҳам анча баланд бўлиши кутилмоқда.
Минтақада ўта баланд бинолар қурилиши харажатларини аввал баҳолаган пудратчиларнинг ҳисоб-китобларига кўра, икки километрлик минорани барпо этиш тахминан 5 миллиард долларга тушиши мумкин. Якуний қиймат лойиҳанинг тасдиқланадиган ечимларига боғлиқ бўлади.
Минора ва унинг атрофидаги марказий ишбилармонлик ҳудуди Project Rise деб номланган. У Ар-Риёд шимолидаги North Pole йирик комплекс қурилиш лойиҳасининг бир қисми ҳисобланади.
Ҳозирча хабарда қурилишни бошлаш ва якунлашнинг аниқ муддатлари келтирилмаган.
