Toni Bler Yevropada populizmga qarshi kurash markazini tashkil etdi

Buyuk Britaniya sobiq bosh vaziri Toni Bler Yevropada populizmga qarshi kurashish maqsadida Global o‘zgarishlar institutini tashkil etdi, deb yozmoqda Guardian nashri.

Gazetaning yozishicha, Bler asos solgan institut faqatgina ilmiy-tadqiqot markazi bo‘libgina qolmay, "siyosatdagi bo‘shliqlarni to‘ldirish uchun siyosiy maydondir". Uning maqsadi — dunyoning eng yaxshi siyosatchilarini populizmga qarshi strategiyalar va siyosiy yo‘nalishlar bilan ta'minlashdan iborat. Ta'kidlanishicha, so‘nggi vaqtlarda, globallashuvning oqibatlariga madaniy va iqtisodiy qarshilik sifatida populizm kuchayib borayapti. 

"Yevropaning turli hududlarida liberal demokratiyaga nisbatan befarqlik shakllanmoqda. Bu juda ham tashvishli holatdir, masalan, Fransiya yoshlarining kamida 1/3 qismi demokratiya — boshqaruvning eng yaxshi shakli ekaniga shubha qilishadi", — degan Bler nashrga. 

Sobiq bosh vazirning aytishicha, Global o‘zgarishlar institutini "zarurat borligini" his qilgani uchun tashkil etgan. Shu bilan birga, Bler bu yangi partiyaning debochasi emasligiga aniqlik kiritgan. 

Populizm – ayrim siyosatchilarning xalqqa yoqadigan so‘zlarni aytishi, balandparvoz va'dalarni berishi, ammo amalda hech narsani o‘zgartirmasligini anglatadi.