Avval xabar qilinganidek, Maktabgacha ta'lim vazirligi va Puchon universiteti o‘rtasida «Toshkent shahrida Puchon universiteti filialini ochish rejasi» bayonnomasi imzolandi, u yerda maktabgacha pedagogika va psixologiya fakulteti faoliyat yuritadi.
Bugun Puchon universitetining professor-o‘qituvchilari Li Dong Vuk va Li He Gyung bilan uchrashuv bo‘lib o‘tdi. Bu haqda MTV axborot xizmati xabar bermoqda.
Tomonlar hamkorlikni yanada rivojlantirish istiqbollarini muhokama qildilar. Xususan, Toshkent shahrining Chilonzor tumanidagi Pedagogika kolleji hududida universitet filialining qurilishi, 3 yillik bakalavriat bilan O‘zbekistondagi oliy o‘quv yurtlari uchun umumiy o‘quv dasturini ishlab chiqish masalalari ko‘rib chiqildi.
Shuningdek, tomonlar qayta tayyorlash va malaka oshirish kurslari hamda O‘zbekiston Respublikasida maktabgacha ta'limning davlat dasturini ishlab chiqishda ishtirok etish masalalarini muhokama qildilar.
Uchrashuv yakunida mehmonlar tomonidan Maktabgacha ta'lim vazirligiga O‘zbekiston maktabgacha ta'lim sohasida foydalanish uchun bepul o‘quv materiallari taqdim etildi.
