Afg‘onistonda yana fojia: toliblar hujumi natijasida 30 nafar politsiyachi halok bo‘ldi

Afg‘oniston g‘arbida «Tolibon» radikal harakati jangarilarining tungi hujumlari oqibatida afg‘on xavfsizlik kuchlarining 30dan ortiq xodimi halok bo‘ldi. Bu haqda Reuters Afg‘oniston ommaviy axborot vositalariga tayangan holda xabar bergan.

Toliblar mamlakatning g‘arbiy qismidagi Farax viloyatida joylashgan shu nomli shahardagi politsiya bo‘limi va bir necha nazorat-o‘tkazish punktlariga hujum qildi. Jangarilar bo‘limni egallab olishgan va qurol hamda o‘q-dorilarni o‘g‘irlab ketishgan. Huquq-tartibot idoralarining o‘nlab xodimlari turli darajada jarohat oldi.

To‘qnashuvlar yuz bergan tumanga hukumat kuchlari bo‘linmalari yuborildi, hozirgi ma'lumotlarga ko‘ra, yo‘qotilgan obektlar ustidan nazorat qayta tiklandi.

Eslatib o‘tamiz, avvalroq AQSh «Tolibon» bo‘yicha bayonot bergandi.