O‘zbekistonda Atrof-muhitga ta'sirni baholash tizimini yo‘lga qo‘yishga doir seminar bo‘lib o‘tdi

26 avgust kuni Toshkentda Atrof-muhitga ta'sirni baholash tizimi (ATBT) va uni O‘zbekistonda tatbiq etish zarurati mavzusidagi seminar bo‘lib o‘tdi. KUN.UZ muxbirining xabar berishicha, tadbir Markaziy Osiyo mintaqaviy ekologiya markazi (MOMEM) hamda Yevropa xavfsizlik va hamkorlik tashkiloti (YeXHT) qo‘llab-quvvatlashi ostida O‘zbekiston Respublikasi Ekologiya va atrof-muhitni muhofaza qilish davlat qo‘mitasi tomonidan tashkil etilgan. Tadbirda Oliy Majlis Senati vakillari, Qonunchilik palatasi, vazirliklar va idoralar, shuningdek nodavlat-notijorat tashkilotlar hamda oliy ta'lim muassasalari vakillari ishtirok etishdi. 

Atrof-muhitga ta'sirni baholash tizimi va uni O‘zbekistonda tatbiq etish zaruratiga doir seminarni o‘tkazishdan maqsad - davlat ekologiya ekspertizasi sohasidagi milliy qonunchilikni Espo Konventsiyasi qoidalari va boshqa xalqaro standartlarga muvofiq takomillashtirishga oid takliflarni tayyorlashda ko‘maklashish.

Seminarda dastlab Ekologiya va atrof-muhitni muhofaza qilish davlat qo‘mitasi raisi o‘rinbosari, YeXHTning O‘zbekistondagi loyihalari koordinatori Jon MakGregor, BMT Yevropa iqtisodiy komissiyasining atrof-muhit masalalari bo‘yicha mintaqaviy maslahatchisi Saraango Radnaaragchaa hamda MOMEMning O‘zbekistondagi filiali rahbari Shahnoza Umarovalar so‘zga chiqishdi. 

Tadbirning asosiy moderatorlari sifatida esa huquqiy masalalar bo‘yicha xalqaro ekspert Yerji Yendroshka va huquqiy masalalar bo‘yicha xalqaro maslahatchi Andrey Andrusevich ishtirok etdi. 

Seminarning birinchi qismida ATBT konsepsiyasi, Espo Konventsiyasi va boshqa xalqaro standartlarga muvofiq atrof-muhitga ta'sirni baholash to‘g‘risidagi Konventsiya muhokama etildi. Loyihaviy faoliyatni amalga oshirishga ruxsat olish tizimida ATBT va davlat organlarining roliga alohida e'tibor qaratildi. Xalqaro ekspertlar Konventsiya qoidalari va boshqa xalqaro standartlarga muvofiq atrof-muhitga ta'sirni baholash milliy tizimi masalasini ko‘rib chiqishning maqsadga muvofiq bo‘lishini qayd etishdi. 

Tadbirning ikkinchi qismi ATBT jarayonlariga taalluqli faoliyat turlari, transchegaraviy jarayonlar hamda bu jarayonlarda davlat organlarining rolini muhokama qilishga bag‘ishlandi. 

Seminar so‘ngida muhokamalarga yakun yasalib, O‘zbekistonda zamonaviy ATBTni ishlab chiqishni qo‘llab-quvvatlashga yo‘naltirilgan tadbirlarni o‘tkazishga doir keyingi qadamlar belgilab olindi.