Tramp Erdo‘g‘andan hafsalasi pir bo‘lganini tan oldi

Amerika Qo‘shma Shtatlari prezidenti Donald Trampning ma'lum qilishicha, Turkiya prezidenti Rajab Toyyib Erdo‘g‘andan pastor Endryu Branson bilan bog‘liq vaziyat fonida hafsalasi pir bo‘lgan. Bu haqda u Bloomberg'ga bergan intervyusida aytdi.

«Men undan hafsalam pir bo‘ldi, lekin biz vaziyat rivoji qanday kechishini ko‘ramiz», - deya ta'kidlab o‘tdi Tramp.

Amerikalik pastor Endryu Branson terrorizmga yordam berish ayblovi bilan Turkiyada uy qamog‘ida ushlab turilibdi. AQSh Bransonga qo‘yilgan ayblovlarni asossiz deb atagan.

Bundan tashqari, Vashingtondagilarning ishonch bildirishicha, Anqara pastorni atayin hibsga olgan, sababi AQShdan muxolifatchi Fathulloh Gulen topshirilishiga erishmoqchi. Turkiya hukumati Gulenni 2016 yil yozidagi davlat to‘ntarishga urinishni tashkillashtirganlikda ayblamoqda.

Eslatib o‘tamiz, avvalroq Turkiya tan olinmagan hududda harbiy-dengiz bazasini tashkil etmoqchi ekani xabar berilgandi.