UzCard ishlamayapti. Tizimdagi nosozlik qachon bartaraf etiladi?

UzCard banklararo to‘lov tizimi hamon ishlamayapti. Tizimda 15 sentabr kuni soat 18:52da jiddiy nosozlik yuzaga kelgandi va bu muammo ikki kun o‘tib ham bartaraf etilmadi.

Kun.uz muxbirlari UzCard tizimi yagona aloqa markaziga qo‘ng‘iroq qilishdi. U yerdan ma'lumot berishlaricha, tizim hali ishlamagan, ishga tushganda mijozlarga SMS xabarnoma yuboriladi. 

Shu bilan birga, operator tizimdagi nosozliklar bugun, 17 sentabr kuni bartaraf etilishi mumkinligi haqida ma'lum qildi. 

UzCard tizimi ishdan chiqishi O‘zbekistondagi 18 milliondan oshiq plastik karta muomalasiga ta'sir ko‘rsatdi. Markaziy bank ma'lumotlariga ko‘ra, 2018 yilning yanvar—avgust oylarida to‘lov terminallari orqali 39,2 trillion so‘m pul tushgan. Bu esa kuniga o‘rtacha 160 milliard, soatiga o‘rtacha 6,7 milliard so‘m degani. 

Ayni vaqtda muammo sababi hamon aniq aytilmayapti. UzCard tarqatgan ma'lumotda faqat markaz mutaxassislari tomonidan tizimni ishga tushirish uchun barcha zarur chora-tadbirlar olib borilayotgani ma'lum qilingan. Pul mablag‘lariga tegishli barcha ma'lumotlar xavfsiz holatda saqlanmoqda, deyilgan UzCard’ning 16 sentabr kungi xabarida.