“Tekin tomosha” - avtobus bekatida to‘xtagan “damaschi” va “Toshshahartransxizmat” xodimining janjaliga hech kim aralashmadi (video)

Ijtimoiy tarmoqlarda o‘zini “Toshshahartransxizmat” xodimi deb tanishtirgan ayol va avtobus bekatida to‘xtab yo‘lovchi olish bilan shug‘ullanadigan “Damas” haydovchisi o‘rtasida yuzaga kelgan mojaro tasvirlangan videoyozuv tarqaldi.

Ayolning so‘zlariga ko‘ra, u videolavhani “Buyuk ipak yo‘li” avtobus bekatida tasvirga olgan. Tasvirda bekatda yo‘lovchi olayotgan “Damas” avtomobili va uning haydovchisi namoyon bo‘ladi. Ayol haydovchini ilgari ham ogohlantirganini aytadi va haydovchi unga telefonini olib qo‘yishini aytib tahdid qiladi. So‘ngra mashina bekatni tark etadi. Uning ortidan boshqa bir “Damas” avtomobili kelib to‘xtaydi. 

Ayol haydovchiga avtobus bekatida mashinani to‘xtatish mumkin emasligini aytadi. Haydovchi uning telefonda videoga olishiga e'tiroz bildiradi hamda ayolning ortidan kelib turtib yuboradi. Orada mojaroga militsiya xodimi kelib aralashib, ularni ajratib qo‘yadi va voqea joyidan g‘oyib bo‘ladi.

Shundan so‘ng ham asabiylashgan haydovchi ayolga tahdid qilib, uni qo‘pol so‘zlar bilan haqorat qiladi va ayolning telefonini tortib olishga harakat qiladi.

Ayol odamlardan yordam so‘rab qichqiradi va atrofda shuncha odam turganiga qaramasdan birortasi unga yordam berishga harakat qilmaganidan hayratdaligini aytadi.

Youtube'da ko‘rish

Facebook'da ko‘rish

Avvalroq ijtimoiy tarmoqlarda “Matiz” avtomobili haydovchisining jamoat transporti bekatida to‘xtab turib, avtobuslar harakati uchun muammolar keltirib chiqargani tasvirlangan video e'lon qilingan va unga nisbatan Ma'muriy javobgarlik to‘g‘risidagi kodeksning 128-6- (Transport vositalari haydovchilarining to‘xtash yoki to‘xtab turish qoidalarini buzishi) va 135-moddasi (Yo‘l harakati qoidalarida nazarda tutilgan hujjatlari bo‘lmagan shaxslarning transport vositalarini boshqarishi) bilan bayonnoma rasmiylashtirilgani xabar qilingandi.

Bundan tashqari, Shayxontohur tumani ma'muriy sudi tomonidan “Matiz” haydovchisi Ma'muriy javobgarlik to‘g‘risidagi kodeksning 183-moddasida (Mayda bezorilik) nazarda tutilgan huquqbuzarlikda aybdor deb topilgan va unga 5 sutkagacha bo‘lgan muddatda ma'muriy qamoq ko‘rinishidagi jazo tayinlangandi.