Nazarboyev: «Qirg‘izistonga barcha yo‘llarni to‘sib qo‘yganimizda nima sodir bo‘ldi? Ular kurashishdi»

Qozog‘iston prezidenti Nursulton Nazarboyev 5 oktabr kuni respublika xalqiga yo‘llagan murojaatida mamlakatning eksport salohiyatiga to‘xtaldi.

«Eksportga yo‘naltirilgan sanoatlashtirish iqtisodiy siyosatning asosiy elementi bo‘lishi kerak. Hukumat, birinchi navbatda, ishlab chiqarish sohasida eksportchilarni qo‘llab-quvvatlashga e'tibor qaratishi lozim. Bizning savdo siyosatimiz tishsiz qolmasligi kerak. Mahsulotni mintaqaviy global bozorlarga chiqarishga harakat qilish, unga faol xarakter berish lozim. Shu bilan birga, biz korxonalarga xalq iste'mol tovarlari keng doirasini o‘zlashtirishga, oddiy narsalar, deb ataluvchi iqtisodiyotini rivojlantirishga yordam berishimiz kerak», - dedi davlat rahbari.

«Atrofimizda nimalar yuz berayotganiga bir qarang. Belarus o‘z ishlab chiqaruvchilarini qanday himoya qilmoqda. Qirg‘izistonga barcha yo‘llarni to‘sib qo‘yganimizda nima sodir bo‘ldi? Ular kurashishdi. Biznikilar jim, hech kim bilan bahslashmaydi ham. Yuqori rahbariyatgina kim bilandir munozaraga kirishishiga o‘rganib qolishgan. Har kim o‘z majburiyatini bajarishi va bizning biznesni himoya qilishi hamda uni uchinchi mamlakatlar bozoriga o‘tishiga yordam berishi shart. Bu nafaqat eksport salohiyatini ro‘yobga chiqarish nuqtai nazaridan, balki ichki bozorni mahalliy mahsulotlar bilan to‘ldirishda ham muhim ahamiyatga ega», - dedi Nazarboyev.

Uning so‘zlariga ko‘ra, Qozog‘istonga xalq iste'mol tovarlari bilan shug‘ullanish vaqti keldi.

«Biz unutdik va o‘tkazib yubordik. Mana, agar bu yerda o‘tirganlardan barcha xorijiy kiyimlarni olib tashlasangiz, yalang‘och bo‘lib qolasizlar. Bizdagilar kostyumlar ham, ko‘ylaklar ham ishlab chiqarishi mumkin. Ularni qo‘llab-quvvatlash kerak. Bugun biz o‘z mahsulotimizni qo‘llab-quvvatlashimiz kerak. Men sizlarga ko‘rsatgandim: xorijnikidan kam bo‘lmagan va o‘n barobar arzon narxga ega, o‘zimizning ishlab chiqaruvchilarimiz kostyumlarini kiyib yuraman. Qozog‘istonliklar boy bo‘lib qoldi, ular narxlarga ham qaramay qo‘yishdi», - deya ma'lum qildi prezident.

Eslatib o‘tamiz, avvalroq Nazarboyev poraxo‘r mansabdorlarni qo‘lga olish haqida MXQga ko‘rsatma bergandi.