Nazarboyev poraxo‘r mansabdorlarni qo‘lga olish haqida MXQga ko‘rsatma berdi

Prezident Nursulton Nazarboyev Qozog‘iston Milliy xavfsizlik qo‘mitasiga korrupsiyaga aralashib qolgan mansabdorlarni qo‘lga olish haqida topshiriq berdi, deya xabar qiladi Tengrinews.kz. 

«Bugungi kunda rahbarlar hujjatni imzolashdan qo‘rqishadi. Ertaga kelib, ularga bosim o‘tkazishadi. Yana qo‘rqitishadi: «Men senga ko‘rsatib qo‘yaman!» Men MXQga bunday mansabdorlarni ushlash va jinoiy ish ochish haqida topshiriq beraman. Kim o‘zi bunday huquq berdi?» - degan Nazarboyev.  

Eslatib o‘tamiz, Nazarboyev Oqo‘rda qarorgohida Qozog‘iston xalqiga murojaat bilan chiqdi. Murojaat mamlakatni ijtimoiy-iqtisodiy rivojlantirishning dolzarb masalalariga hamda qozog‘istonliklar farovonligini yanada oshirish bo‘yicha vazifalarga qaratilgan.

Nazarboyev 1 sentabr kuni parlament palatalarining qo‘shma yig‘ilishida xalqqa murojaat bilan chiqishi haqida xabar bergandi.
 
«Biz sizlar bilan juda qizg‘in vaqtda yashayapmiz. Aniqroq choralar ko‘rishimiz kerak. Bu mening yaqin vaqt ichida xalqqa murojaatimda aytiladi», - degandi Nursulton Nazarboyev hukumat a'zolari va deputatlarga.

Eslatib o‘tamiz, O‘zbekistonda ham so‘nggi paytlarda korrupsiyaga aralashib qolgan mansabdor shaxslarga qarshi kurash keng quloch yozdi. 

Avvaliga, Samarqand viloyatiga rahbarlik qilgan Turobjon Jo‘rayev pora bilan qo‘lga tushdi. Shundan so‘ng, Toshkent shahrining Yunusobod tumani hokimi, Andijon shahar hokimligi bosh mutaxassisi, «O‘zbekiston pochtasi»ning Samarqand filiali rahbari, Qashqadaryo viloyati Muborak tumani hokimi yordamchisi va tuman moliya bo‘limi rahbari, Namanganda hokim o‘rinbosari,  Toshkent viloyati hokimligi Moliya bosh boshqarmasi boshlig‘i birinchi o‘rinbosari pora bilan qo‘lga olindi.