Ijtimoiy tarmoqlarda o‘zini “Toshshahartransxizmat” xodimi deb tanishtirgan ayol va avtobus bekatida to‘xtab yo‘lovchi olish bilan shug‘ullanadigan “Damas” haydovchisi o‘rtasida yuzaga kelgan mojaro tasvirlangan videoyozuv tarqalgandi.
Ayol haydovchiga avtobus bekatida mashinani to‘xtatish mumkin emasligini aytadi. Haydovchi uning telefonda videoga olishiga e'tiroz bildiradi hamda ayolning ortidan kelib turtib yuboradi. Orada mojaroga militsiya xodimi kelib aralashib, ularni ajratib qo‘yadi va voqea joyidan ketadi.
Toshkent shahar Ichki ishlar bosh boshqarmasining ma'lum qilishicha, "Damas" haydovchisiga Mirzo Ulug‘bek tumani ma'muriy sudi tomonidan uch sutka ma'muriy qamoq jazosi tayinlangan, shuningdek, u 368 ming so‘mlik jarimaga tortilgan.
IIBBning qayd etishicha, ichki ishlar xodimi metropolitendagi postda xizmat olib borgan, u yo‘riqnomada belgilangan tartibda ish ko‘rgan. U postni tashlab, tartibni saqlash uchun choralar ko‘rgani aytiladi: xodim yaqin oradagi patrul-post xizmati naryadini chaqirgan. Shundan so‘ng xodim postga qaytib ketgan.
Afsuski, shu voqeani ko‘rib turgan biror erkak na haydovchiga tanbeh berdi, na ayolni tinchlantirdi. Yurtdoshlarimizning fuqarolik burchiga munosabati shunaqa, deyiladi IIBB xabarida.
Avvalroq ijtimoiy tarmoqlarda “Matiz” avtomobili haydovchisining jamoat transporti bekatida to‘xtab turib, avtobuslar harakati uchun muammolar keltirib chiqargani tasvirlangan video e'lon qilingan va unga nisbatan Ma'muriy javobgarlik to‘g‘risidagi kodeksning 128-6- (Transport vositalari haydovchilarining to‘xtash yoki to‘xtab turish qoidalarini buzishi) va 135-moddasi (Yo‘l harakati qoidalarida nazarda tutilgan hujjatlari bo‘lmagan shaxslarning transport vositalarini boshqarishi) bilan bayonnoma rasmiylashtirilgani xabar qilingandi.
Bundan tashqari, Shayxontohur tumani ma'muriy sudi tomonidan “Matiz” haydovchisi Ma'muriy javobgarlik to‘g‘risidagi kodeksning 183-moddasida (Mayda bezorilik) nazarda tutilgan huquqbuzarlikda aybdor deb topilgan va unga 5 sutkagacha bo‘lgan muddatda ma'muriy qamoq ko‘rinishidagi jazo tayinlangandi.
