Jahon chempionati sovrindori, Osiyo chempioni Elnur Abduraimov AQShda professional boksdagi ikkinchi jangini o‘tkazdi. Kaliforniya shtati Indio shahridagi “Fantasy Springs Casino” arenasi mezbonlik qilgan bahsda o‘zbekistonlik bokschiga amerikalik charm qo‘lqop ustasi Jovanni Gonsales raqiblik qildi. Bu haqda Milliy olimpiya qo‘mitasi axborot xizmati ma'lum qildi.
Avvalroq Elnur amerikalik boshqa bir bokschi Xose Salinasga qarshi ringga ko‘tarilishi kerak edi, lekin jangga bir kun qolganida raqib o‘zgardi.
Gonsalesga qarshi jangni katta ustunlik bilan boshlagan Abduraimov ikkinchi raundga kelib raqibini nokautga uchratdi. Bu Elnurning ikkinchi jangdagi ikkinchi nokautli g‘alabasi bo‘ldi.
Ma'lumot uchun, Gonsales prof ringda 7 ta jang o‘tkazib, ularning 5 tasida g‘alaba qozongan, 2 ta jangda mag‘lubiyatga uchragandi. Elnur esa sentabr oyi oxirida prof ringdagi debyutini amerikalik Aron Xollinsni nokautga uchratish orqali nishonlagan edi.
