Jasur Aripov Urbanizatsiya agentligiga rahbar etib tayinlandi. U vazir o‘rinbosari ham hisoblanadi

Unga 5 nafar o‘rinbosar tayinlangan. Jasur Aripovdan tashqari quyidagilar vazir o‘rinbosari hisoblanadi.

Ravshan Ayubovich G‘ulomov - (1968 yilda tug‘ilgan) iqtisodiyot va sanoat vazirining birinchi o‘rinbosari.

U Toshkent davlat universiteti (1992) va Avstraliya milliy universiteti (1998) bitiruvchisidir.

1992—2004 yillarda Markaziy bankda ishlagan (2001 yildan Markaziy bank raisining birinchi o‘rinbosari). 2004—2007 yillarda Markaziy bank raisining birinchi o‘rinbosari va «Asaka» banki boshqaruvi raisi, 2007—2016 yillarda moliya vazirining birinchi o‘rinbosari, iqtisodiyot vaziri, tashqi iqtisodiy aloqalar, investitsiyalar va savdo vaziri hamda O‘zbekiston Tiklanish va taraqqiyot jamg‘armasi ijrochi direktori lavozimlarida ishlagan. 2017 yil aprelidan 2018 yil avgustiga qadar Davlat raqobat qo‘mitasi raisi sifatida ishladi, so‘ng Vazirlar Mahkamasi departamentiga rahbarlik qildi.

Sohib Ismoilovich Saifnazarov (1973 yilda tug‘ilgan) iqtisodiyot va sanoat vaziri o‘rinbosari etib tayinlandi.

U Toshkent davlat iqtisodiyot universitetini tamomlagan. 1996 yildan 1998 yilgacha «O‘zbekqishloqxo‘jalikmash» korxonasida iqtisodchi bo‘lib ishlagan. 1999—2001 yillarda Toshkent viloyat hokimligida axborot-tahlil guruhi yetakchi mutaxassisi bo‘lgan.

2001—2003 yillarda O‘zbekiston Makroiqtisodiyot va statistika vazirligi sho‘’ba korxonasini boshqargan. 2004—2009 yillarda Iqtisodiyot vazirligida turli lavozimlarda faoliyat ko‘rsatgan. 2012—2017 yillarda «Angren» erkin iqtisodiy zonasida davlat unitar korxonasi direktori bo‘lgan. 2017 yil avgustida Sohib Saifnazarov tashqi savdo vaziri o‘rinbosari etib tayinlangan edi.

Umidjon Zokirjonovich Salimov (1976 yilda tug‘ilgan) iqtisodiyot va sanoat vaziri o‘rinbosari etib tayinlandi.

U Toshkent davlat texnika universiteti va Toshkent avtomobil-yo‘llar instituti aspiranturasini tamomlagan, texnika fanlari nomzodi. U mehnat faoliyatini 1998 yilda boshlagan. 2005—2007 yillarda «O‘zavtosanoat» marketing, savdo strategiyasi va eksport salohiyatini rivojlantirish boshqarmasi bosh mutaxassisi bo‘lgan. 2007—2009 yillarda GM Uzbekistan yangi loyihalar boshqarmasi bo‘lim bosh menejeri lavozimida ishlagan. 

2009—2011 yillarda GM Powertrain Uzbekistan bosh direktori o‘rinbosari bo‘lgan. 2011—2013 yillarda esa «O‘zavtosanoat» boshqaruvi raisi o‘rinbosari edi. 2013—2017 yillarda oliy va o‘rta maxsus ta’lim vazirining birinchi o‘rinbosari va O‘rta maxsus kasb-hunar ta’limi markazi direktori sifatida ish olib bordi. 2017—2018 yillarda «O‘zavtosanoat» raisi o‘rinbosari, keyinchalik raisi sifatida ishladi. 2018 yil iyunidan beri «O‘zavtosanoat» raisining rivojlanish va marketing masalalari bo‘yicha o‘rinbosari sifatida ishlab kelayotgan edi.

Botir Shukurillayevich Usmonov ham Iqtisodiyot va sanoat vazirligi rahbari o‘rinbosarlaridan biri etib tayinlandi.

U Qozon davlat texnika universiteti (1993) bitiruvchisi, Andxra universiteti (Hindiston, 1999) magistranti, Gamburg texnika universiteti (2001) magistrantidir.

Bugungi kunga qadar Toshkent axborot texnologiyalar universitetida (2017—2019) ilmiy ishlar bo‘yicha prorektor, Lomonosov nomidagi MDU Moskva filiali amaliy matematika va informatika kafedrasi dotsenti, oliy va o‘rta maxsus ta’lim vaziri o‘rinbosari (2013—2016) lavozimlarida faoliyat ko‘rsatgan.