Tan jarohati olgan harbiy xizmatchilarga nafaqa to‘lash to‘g‘risidagi yo‘riqnomaga o‘zgartirishlar kiritiladi

Normativ-huquqiy hujjatlar loyihalari muhokamasi portalida “Xizmat majburiyatlarini bajarayotganda harbiy xizmatchilar (harbiy xizmatga majburlar) halok bo‘lgan yoki tan jarohati olgan holda bir yo‘la to‘lanadigan nafaqani to‘lash tartibi to‘g‘risidagi yo‘riqnomaga o‘zgartirishlar kiritish haqida”gi hujjat loyihasi joylashtirildi.

Hujjatga ko‘ra O‘zbekiston Respublikasi mudofaa vazirining 2010 yil 5 avgustdagi 430-son buyrug‘i bilan tasdiqlangan Xizmat majburiyatlarini bajarayotganda harbiy xizmatchilar (harbiy xizmatga majburlar) halok bo‘lgan yoki tan jarohati olgan holda bir yo‘la to‘lanadigan nafaqani to‘lash tartibi to‘g‘risidagi yo‘riqnomaga o‘zgartirishlar kiritilishi mumkin.

Xizmat majburiyatlarini bajarayotganda harbiy xizmatchilar (harbiy xizmatga majburlar) halok bo‘lgan yoki tan jarohati olgan holda bir yo‘la to‘lanadigan nafaqani to‘lash tartibi to‘g‘risidagi yo‘riqnomaga kiritilishi rejalashtirilgan o‘zgartirishlar:

5-band quyidagi tahrirda bayon etiladi:

“5. Tan jarohatining harbiy xizmatchilarning harbiy xizmat majburiyatlarini bajarishi bilan bo‘lgan sababiy bog‘lanish O‘zbekiston Respublikasi Prezidentining 2018 yil 25 dekabrdagi PQ–4076-son qarori bilan tasdiqlangan O‘zbekiston Respublikasi Qurolli Kuchlarida tinchlik va urush davrida tibbiy ko‘rikdan o‘tkazish to‘g‘risidagi nizomda belgilangan tartibda harbiy-shifokorlar komissiyalari tomonidan aniqlanadi.”.

11-bandning ikkinchi xatboshisidan “O‘zbekiston Respublikasi Vazirlar Mahkamasining 2003 yil 21 fevraldagi 95-son qarori bilan tasdiqlangan O‘zbekiston Respublikasi Qurolli kuchlarida tinchlik va urush davrida tibbiy ko‘rik o‘tkazish to‘g‘risidagi nizomning 15-ilovasiga muvofiq,” degan so‘zlar chiqarib tashlanadi.