«O‘zbekiston havo yo‘llari» samolyoti Pulkovo aeroportida uchish-qo‘nish yo‘lagidan chiqib ketdi

2 mart oqshomda Toshkentdan Sankt-Peterburgga uchib kelgan yo‘lovchi samolyoti qo‘nishni amalga oshirgandan keyin uchish-qo‘nish yo‘lagidan tashqariga chiqib ketdi. Bu haqda Pulkovo aeroportini boshqaruvchi kompaniya matbuot xizmati ma'lum qildi.  

Gap “O‘zbekiston havo yo‘llari”ning Toshkentdan reys amalga oshirgan Boeing 767 samolyoti haqida bormoqda. Ma'lum qilinishicha, samolyot mahalliy vaqt bilan soat 21:59da qo‘ngan, biroq rullash vaqtida yo‘lakdan chiqib ketgan.

Aeroport xizmatlari darhol voqea joyiga yetib kelib, yo‘lovchilarni samolyotdan tezkorlik bilan tushirishgan va avtobuslarda terminalga yetkazishgan. Jabrlanganlar yo‘q.

Boshqaruvchi kompaniyada samolyot turar joygacha shatakda olib borilishi ma'lum qilingan. Aeroport odatdagi tartibda ishlayotgani, uchish-qo‘nish ikkinchi yo‘lakdan amalga oshirilayotgani aytilgan.

Dastlabki ma'lumotlarga ko‘ra, voqea yomon ob-havo sharoiti sababli yuz bergan. Politsiya voqea yuzasidan tergov olib bormoqda. 

Sankt-Peterburgning “Fontanka” nashrining ma'lum qilishicha, 2 mart kuni shaharga yopirilgan bo‘ron va kuchli shamol sababli shaharga uchib kelayotgan ba'zi samolyotlar qo‘nishga ruxsat berilishini poylab shahar uzra uchib yurgan, ba'zilari esa zaxira aerodromlarga ketishga majbur bo‘lgan. 

Eslatib o‘tamiz, “O‘zbekiston havo yo‘llari” aviakompaniyasi Pokiston va Hindiston o‘rtasidagi siyosiy mojarolar tufayli havo yo‘llari yopilganligi sabab 1 martdagi Lohur-Toshkent qatnovini bekor qilgandi. Shu sababli Pokiston ustidan o‘tuvchi ba'zi yo‘nalishlarda muammolar kuzatilishi mumkin.