Kosonsoyda o‘qituvchilar beton quyishda ishlatilgani tasdiqlandi. Tuman hokimi bu holat OAVda chiqishini «pashshadan fil yasash» deb atagandi

Namangan viloyati Kosonsoy tuman hokimining sanoatni rivojlantirish, kapital qurilish, kommunikatsiyalar, kommunal xo‘jalik masalalari bo‘yicha o‘rinbosari M.Isomiddinov tuman hududidagi anhor bo‘yidagi hashar ishlariga tumandagi maktablar xodimlarini jalb etishga ko‘rsatma bergani tasdiqlandi. Bu haqda O‘zbekiston Respublikasi Bandlik va mehnat munosabatlari vazirligi Davlat mehnat inspeksiyasi o‘tkazgan tekshiruv xulosasida keltiriladi.

«O‘zbekiston Respublikasi Bandlik va mehnat munosabatlari vazirligi Davlat mehnat inspeksiyasi tomonidan o‘tkazilgan tekshiruv natijalariga ko‘ra Namangan viloyati, Kosonsoy tumanida joylashgan 54ta maktab o‘qituvchilari Kosonsoy tumani Namuna qishlog‘i yaqinidagi anhor bo‘yida olib borilgan qurilish-obodonlashtirish ishlariga jalb qilinib, tegishli tartibda ishlash uchun har bir maktab o‘qituvchilariga 10 metrdan hudud bo‘lib berilganligi hamda mazkur ishlarga majburiy ravishda jalb qilinganligi holatlari aniqlandi.

Shunga muvofiq, Namangan viloyati, Kosonsoy tuman hokimining sanoatni rivojlantirish, kapital qurilish, kommunikatsiyalar, kommunal xo‘jalik masalalari bo‘yicha o‘rinbosari M.Isomiddinovga nisbatan O‘zbekiston Respublikasi mehnat qonunchiligi hamda Vazirlar Mahkamasining 2018 yil 10 maydagi «O‘zbekiston Respublikasida majburiy mehnatga barham berishga doir qo‘shimcha chora-tadbirlar to‘g‘risida»gi 349-sonli qarori talablariga zid ravishda maktab xodimlarini qurilish ishlariga jalb qilganligi yuzasidan ma'muriy bayonnoma tuzildi va O‘zbekiston Respublikasi Ma'muriy javobgarlik to‘g‘risidagi Kodeksining 51-moddasiga asosan ma'muriy javobgarlikka tortildi», deyiladi O‘zbekiston Respublikasi Bandlik va mehnat munosabatlari vazirligi Davlat mehnat inspeksiyasi ma'lumotida.

Kosonsoyda o‘qituvchilar beton quyishga olib chiqilgani to‘g‘risidagi «Namanganda o‘qituvchilar beton quyishdi. Har bir maktab uchun alohida joy ajratilgan» sarlavhali maqola Kun.uz saytida 2 iyul kuni e'lon qilingandi.

3 iyul kuni esa 2019 yil yanvaridan buyon tumanga hokimlik qilib kelayotgan Bahodir Tursunovich Yusupov (u 2009-2015 yillarda Namangan viloyati hokimi, 2018-2019 yillarda Qishloq xo‘jaligi vaziri bo‘lgan) ijtimoiy tarmoq orqali chiqishida bu ma'lumotga raddiya bergan va maqolani ishonchli manbalarga asoslanmagan deb baholagandi.

«Aytishim kerakki, barcha sevib o‘qiydigan, eng ishonchli ma'lumotlar beriladigan Kun.uz saytida Kosonsoydagi birorta ijobiy ish yoritilmagan.

Saytdagi bu maqola ishonchli manbalarga asoslanmagan deb o‘ylayman. Mayli, jurnalistik etika nuqtai nazaridan bizdan so‘rashmasin, lekin yoritishda adolat bilan yondashish kerak.

Men o‘zim o‘qituvchining bolasiman. Otam til-adabiyot o‘qituvchisi bo‘lgan, onam farrosh bo‘lgan. O‘qituvchining bolasi bo‘lib o‘qituvchining hurmatini joyiga qo‘ymasam, qaysi nonga katta bo‘lganman, degan savol chiqadi. Endi o‘qituvchilarni olib chiqibdi, undoq qilibdi, bundoq qilibdi, degan gaplar noo‘rin gaplar...

Ko‘p ijtimoiy tarmoqlarda «o‘qituvchilar ishdan bo‘shatildi», «qayta tiklandi» degan gaplar chiqdi. Boshqa ishi yo‘qmi? Nega chiqib mehnat qilgan bo‘lsa, o‘qituvchi ishdan ketadi. Tushunarsiz, xalqni chalg‘ituvchi va vaqtini oluvchi ishlarga vaqtni sarflashning nima keragi bor?

Undan ko‘ra, milliy madaniyatimizni oshirish masalalarini, yurtboshimiz oldimizga qo‘yayotgan vazifalar qanday ijro qilinayotganini yoritish kerak.

Biz bu maqoladan xafa emasmiz. Kamchiliklarimizni to‘g‘rilaymiz. Shu kabi holatlarga yo‘l qo‘ymaslik ustida ishlaymiz.

O‘zimni oqlamoqchimasman. Lekin o‘qituvchilar ishtirok etgan emas! Iye? Qolaversa, ayollar mehnatiga yo‘l qo‘yilmagan. Gender tengligi degan narsalar bor. Biz hammasini davlatimiz rahbari qanday qilayotgan bo‘lsa, biz o‘rnak olamiz, topshiriqlar ijrosini ta'minlaymiz.

Yagona istagim shundaki, besamar vaqt oluvchi, ayniqsa pashshadan fil yasaydigan shunaqa holatlarga yo‘l qo‘ymasligimiz kerak», degandi hokim.

Bundan avvalroq Xalq ta'limi vazirligi matbuot xizmati Kosonsoy tuman markazida tashkil etilayotgan «Yashil xiyobon» hududida xalq ta'limi tizimida faoliyat yurituvchi texnik xodimlarni majburiy mehnatga jalb qilish holati o‘rganib chiqilgach, Kosonsoy tumani xalq ta'limi bo‘limi mudiri vazifasini vaqtinchalik bajaruvchi F.N. vazifasidan ozod etilgani, vazirlik  Bosh prokuraturaga murojaat qilib, shu maktablarning 80 nafar xodimiga beton quydirgan mansabdorlarga nisbatan chora ko‘rishni so‘ragani haqida xabar qilgandi.

Eslatib o‘tamiz, fuqarolar mehnat huquqlari buzilgani yuzasidan O‘zbekiston Respublikasi Bandlik va mehnat munosabatlari vazirligining +99871-200-06-00 raqamli yagona ishonch telefoni yoki mehnathuquq_bot Telegram kanali orqali o‘z murojaatlarini yuborishlari mumkin.