Xalqaro musobaqada ishtirok etish uchun “Forish”ga kelgan xorijlik harbiylar nima bilan band?

4 avgust kuni start beriladigan Xalqaro armiya o‘yinlarining “Harbiy-tibbiy estafeta” tanlovida ishtirok etish uchun O‘zbekistonga kelgan 10 ta xorijiy davlat harbiylari qizg‘in tayyorgarlikni boshlab yubordi. Bu haqda Mudofaa vazirligi Axborot va ommaviy kommunikatsiyalar departamenti xabar bermoqda.

Jamoalar xalqaro tanlov doirasida erkak va ayol harbiy xizmatchilar individual mahoratlarini AK-74 avtomati va PM pistoletidan otish, TAYFUN-K harbiy texnikasi orqali to‘siqli yo‘llarni yengib o‘tish, tibbiy xizmat harbiylarining majmuaviy mashg‘ulotlari (to‘siqli yo‘lak va shaxsiy mahorat) hamda maxsus harbiy texnikani haydash mahorati shartlari bo‘yicha tayyorgarlik mashg‘ulotlarida namoyish etdi.

Jahonning turli mintaqalaridan tashrif buyurgan mehmonlar amaliy tajribalariga ishonch hosil qilibgina qolmay, O‘zbekistonning iqlimiga moslashmoqda.

“Qardosh o‘zbek xalqining naqadar tantiligi, mehmondo‘stligiga yana bir bor amin bo‘ldik. Buning uchun men, o‘zbek xalqiga Ozarbayjon xalqi nomidan rahmat aytaman. Kayfiyatimiz a'lo darajada... Ayni damda otish tayyorgarligi mashqlarini bajaryapmiz. Yuz va ellik metr uzoqlikda joylashgan nishonni yakson qilish tajribali merganlarga murakkablik tug‘dirmadi”, – deydi ozarbayjonlik tibbiy xizmat katta leytenanti Guntekin Mamedzoda.