Maktabgacha ta'limdagi noqonuniy xarajatlarning 28 foizi «o‘lik jonlar» hisobiga to‘g‘ri kelgan - MTV

Maktabgacha ta'lim tizimida 2018 yilda noqonuniy xarajatlarning 40 foizi, 2019 yilning birinchi choragida esa 28 foizi «o‘lik jonlar», ya'ni maktabgacha ta'lim tashkilotlarida turli lavozimlarga rasmiylashtirilgan, lekin, aslida, muassasada ishlamaydigan shaxslar hisobiga to‘g‘ri kelgan. Bu haqida Maktabgacha ta'lim vazirligi tomonidan korrupsion holatlarga chek qo‘yish maqsadida o‘tkazilgan maxsus seminarda ma'lumot berildi.

Seminarda aytilishicha, MTTlarda bolalar tegishli yo‘llanmasiz qabul qilinib, o‘z navbatida, yo‘llanmasiz qatnayotgan bolalar uchun to‘langan to‘lov pullari g‘aznaga kirim qilinmasdan MTT mudirasining noqonuniy daromad manbasiga aylanmoqda. Bunda bolalar sog‘ligi va xavfsizligi ham xavf ostiga qo‘yilmoqda.

Vazirlik ichki audit, moliyaviy va huquqiy nazorat xizmati boshlig‘i Dilshod Normatovning ta'kidlashicha, maktabgacha ta'lim tizimida korrupsiya ko‘proq quyidagi holatlarda sodir bo‘lmoqda:

-        MTTlarga xodim qabul qilishda;

-        Xodimlarning ish stavkasini oshirishda (bunda 0.5 stavkani 1 stavkaga yetkazish kabi hollar nazarda tutiladi);

-        Bolalarni MTTga joylashtirishda.

«Xodimlarni «o‘lik jon» qilish masalasiga ko‘z yumib bo‘lmaydi. Bu tarbiyachi «o‘lik jon» bo‘lgan MTTda bola berilishi kerak bo‘lgan tarbiyani olmayotganini anglatadi. O‘sha kunda olinishi kerak bo‘lgan narsadan mahrum qilish bilan esa bolaning tiklab bo‘lmas huquqi buzilishiga yo‘l qo‘yiladi», deya Dilshod Normatovning so‘zlarini keltirmoqda Kun.uz muxbiri.

Maktabgacha ta'lim vaziri birinchi o‘rinbosari Sobitxon Turg‘unov o‘z nutqida vazirlikning oldida turgan eng katta vazifalardan biri ham korrupsion holatlarning oldini olish ekanini aytib o‘tdi.

«Vazirlik bolalarni maktabgacha ta'limga qabul qilishdagi tanish-bilishchilikni kamaytirish bo‘yicha davlat xizmatlari agentligi bilan hamkorlikda ishlayapti. MTT rahbarlarining lavozimiga tayinlanishi bilan bog‘liq korrupsion holatlarni yo‘qotish uchun esa kuzatuv kengashlarini tashkil qilganmiz», deya amalga oshirilayotgan ishlar haqida ma'lumot berdi Sobitxon Turg‘unov.