Respublikada eng xavfsiz va eng ishonchli atom elektr stansiyasini qurish bo‘yicha tanlov amalga oshirilgan - «O‘zatom» boshqarma boshlig‘i

31 oktabr kuni Ekologiya va atrof muhitni muhofaza qilish davlat qo‘mitasi, Energetika vazirligi huzuridagi Atom energetikasini rivojlantirish agentligi, Sog‘liqni saqlash vazirligi, Favqulodda vaziyatlar vazirligi, Sanoat xavfsizligi davlat qo‘mitasi, Veterenariya va chorvachilikni rivojlantirish davlat qo‘mitasi, Davlat geologiya va mineral resurslar qo‘mitasi mutasaddilari bilan bo‘lib o‘tgan matbuot anjumanida O‘zbekistonda qurilishi rejalashtirilgan atom elektr stansiyasi haqida ma'lumot berildi.

«O‘zatom» agentligi boshqarma boshlig‘i Shavkat Abdukamilovning ma'lum qilishicha, respublikada qurilishi rejalashtirilgan atom elektr stansiyasi kabi stansiya Rossiyaning Novovoronej shahrida qurilib, sanoat foydalanishiga topshirilgan. Bundan tashqari, hozirda Turkiya va Bangladeshda (ularning seysmik va iqlim sharoitlari O‘zbekistonnikiga yaqin) ham qurilmoqda. Xuddi shu loyiha O‘zbekistonda referent loyiha sifatida qabul qilinib, tanlab olingan va uni amalga oshirish rejalashtirilgan. 

«Respublikamizda hozirgi eng so‘nggi avlod 3+ avlodli VVR 1200 yadro reaktorlariga ega bo‘lgan 2ta energoblokli atom elektr stansiyasi qurish rejalashtirilgan.

Bu atom elektr stansiyasida qandaydir avariyalar bo‘lish holatlari, ehtimoli umuman yo‘q desa ham bo‘ladi. U o‘n million yilda bir martagacha degan ehtimol bilan keladi. Absolyut xavfsiz atom stansiyalari deb bemalol e'tirof etishimiz mumkin.

Avariya bo‘lish ehtimoli juda ham kam. Loyiha avariyalari bo‘lishi mumkin. Hayotda istalgan sohani, istalgan zavod va fabrikani oladigan bo‘lsangiz, qaysidir qurilmada biror nosozlik kelib chiqishi mumkin. Bularning hammasi loyihada belgilangan me'yorlar va uni bartaraf qilish ketma-ketligi chora-tadbirlari ishlab chiqilgan bo‘ladi. Bari amalga oshiriladi. Hech qanday qo‘rquv bo‘lishi kerak emas. Eng xavfsiz, eng ishonchli atom elektr stansiyasini qurish bo‘yicha tanlov amalga oshirilgan», - deya Abdukamilovning so‘zlarini keltirmoqda Kun.uz muxbiri. 

U O‘zbekistonning atom energetikasi sohasidagi tajribasiga ham alohida to‘xtalib o‘tdi.

«Ko‘pchilik respublikamizni atom energetikasi sohasiga yangi kirib kelgan mamlakat deb o‘ylaydi. Aslida unday emas. Oltmish yildan beri respublikamizda Yadro fizikasi institutida tadqiqot reaktori bor. O‘sha yerdagi reaktordan foydalanib kelyapmiz. Bundan tashqari, oldin «O‘zeltexsanoat» huzurida «Foton» tashkiloti bo‘lar edi, ularning ham tadqiqot reaktori bor edi. Uni bir necha yil oldin dekomissiya qilib, ekspluatatsiyadan foydalanishdan chiqardik.

Respublikada atom energiyasidan foydalanish sohasida olimlar, mutaxassislar, tajriba bor», deya o‘z fikrlarini bildirdi Abdukamilov.