Tojikiston O‘zbekiston bilan chegaradagi zastavaga hujum bo‘yicha qo‘shimcha ma'lumot berdi

Tojikiston-O‘zbekiston chegarasida joylashgan chegara zastavasiga hujum qilgan shaxslar IShID terrorchi guruhi jangarilari bo‘lgan. Ular Tojikistonga Afg‘oniston tomondan o‘tib kelishgan. Bu haqda Tojikiston Milliy xavfsizlik davlat qo‘mitasi matbuot xizmati ma'lum qildi.

«Ular Afg‘oniston Islom Respublikasi hududidan maxsus topshiriq bilan o‘tishgan, ularning barchasi IShID terrorchi guruhi a'zolari hisoblanadi», - deyiladi xabarda.

Aniqlik kiritilishicha, jangarilar 3 noyabr kuni Tojikistonning Qubodiyon tumaniga Afg‘oniston shimoli-sharqidagi Qunduz viloyati Qalai-Zol uyezdi tomondan o‘tishgan. Qo‘lga olingan terrorchilarni so‘roq qilish jarayonida ular «Ishkobod» chegara zastavasi ular uchun «eng qulay joy» bo‘lganini aytishgan.

Bundan avvalroq Tojikiston Milliy xavfsizlik davlat qo‘mitasi Chegara qo‘shinlarining matbuot markazi 20 kishidan iborat bo‘lgan qurollangan guruh Tojikiston-O‘zbekiston chegarasida joylashgan chegara zastavasiga hujum qilgani to‘g‘risida xabar qilgandi.

Terrorchilarga qarshi o‘tkazilgan amaliyot natijasida qurshab olingan qurolli jinoiy guruhning 15 nafar a'zosi yo‘q qilingan, besh nafari qo‘lga olingan. Otishma oqibatida chegara qo‘shinlari askari va bir militsioner halok bo‘lgan.