2022 yilda butun respublika bo‘ylab o‘tkaziladigan aholini ro‘yxatga olish tadbirlariga taxminan 150 ming nafar xodim jalb etiladi. Bu haqida Axborot va ommaviy kommunikatsiyalar agentligida Davlat statistika qo‘mitasi xodimlari ishtirokida o‘tkazilgan matbuot anjumanida ma'lumot berildi.
«2022 yilda amalga oshiriladigan mazkur tadbirda dastlabki hisob-kitoblarga ko‘ra, 150 ming nafar xodim jalb qilinishi ko‘zda tutilgan. Ular aynan o‘qituvchilar yoki vrachlar bo‘lishi kabi rejalar yo‘q. Hududlardagi komissiyalarga ko‘ngilli tarzda murojaat qilgan turli soha vakillari o‘qitilib, shartnoma asosida mazkur tadbirlarga jalb qilinadi.
Ro‘yxatga olish tadbirlariga qatnashadigan xodimlarga qancha maosh berilishi masalasi hali to‘liq hal qilinmagan, lekin taxminiy hisob-kitoblar aholini ro‘yxatga olish tadbirlarida aholi jon boshiga taxminan 3 dollardan xarajat to‘g‘ri kelishini ko‘rsatmoqda», - deya Davlat statistika qo‘mitasi Demografiya va mehnat statistikasi boshqarmasi boshlig‘i Qobiljon Berdiqulovning so‘zlarini keltirmoqda Kun.uz muxbiri.
Davlat statistika qo‘mitasi raisining o‘rinbosari Agzam Ikramovning qo‘shimcha qilishicha esa, ro‘yxatga olish tadbirlarida har bir xonadonga borib odamlarni savol-javob qilish juda mushkul jarayon. Chunki hamma xonadon ham buni to‘g‘ri qabul qilmasligi mumkin.
«Shuning uchun bu tadbirlarga ko‘proq o‘sha mahalla va oila haqida ma'lumotga ega bo‘lgan, o‘sha hududda yashovchi odamlar ko‘ngilli tarzda jalb qilinadi. Bu so‘ralayotgan ma'lumotlarning imkon qadar aniq va shaffofligini ta'minlashga yordam beradi», deydi qo‘mita raisi o‘rinbosari.
Tadbir davomida statistika bo‘yicha xalqaro reytinglarda O‘zbekiston qaysi darajada ekaniga aniqlik kiritildi.
Ma'lum bo‘lishicha, xalqaro «Open data Inception» reytingi ma'lumotiga ko‘ra, O‘zbekiston 2019 yilda 52ta ochiq ma'lumotlar manbalari bilan ochiq ma'lumotlar manbalari soni mavjudligi reytingida jahon mamlakatlari ichida birinchi o‘ntalikdan 9-o‘rinni egalladi.
«Bundan tashqari, milliy statistika ochiqligi bo‘yicha xalqaro «Open data watch» reytingida ham O‘zbekiston o‘rnini yaxshilash oldinga qo‘yilgan vazifalardan biri bo‘lib qolmoqda. 2019 yil boshiga qadar bo‘lgan vaqt davomida O‘zbekiston mazkur reytingda 168-o‘rinni egallagan», deya ta'kidladi Davlat statistika qo‘mitasi Ochiq ma'lumotlar portali faoliyatini monitoring qilish va muvofiqlashtirish boshqarmasi boshlig‘i Akrom Sultonov.
