Avtomashinani stikersiz boshqarganlik uchun jarimani karantindan keyin to‘lashga ruxsat etiladimi?

Avtomashinamni ruxsatnomasiz boshqarganligim uchun 4 mln 460 ming so‘m jarimaga tortilganman? Prezidentimiz qarori bilan jarimani karantindan keyin to‘lashga ruxsat etilgani to‘g‘rimi?

Prezidentning 2020 yil 3 apreldagi “Koronavirus pandemiyasi davrida aholi, iqtisodiyot tarmoqlari va tadbirkorlik sub'yektlarini qo‘llab-quvvatlashga doir qo‘shimcha chora-tadbirlar to‘g‘risida”gi PF–5978-son Farmoniga ko‘ra, karantinga olingan shaxslarga nisbatan qo‘llanilgan ma'muriy jarimalarni (karantin qoidalarini buzganlik uchun javobgarlik bundan mustasno) to‘lash muddatlari karantin muddati tugagunga qadar uzaytirilishi belgilangan. 

Shundan kelib chiqib, siz karantin qoidalarni buzganligingiz uchun Sizga nisbatan qo‘llanilgan ma'muriy jarimalarni to‘lash muddati uzaytirilmaydi. 

Bundan tashqari, mazkur norma faqat karantinga olingan shaxslarga nisbatan tatbiq etiladi.

Xususiy klinikaning bosh vrachiman, lekin bizda xizmat mashinalarimiz yo‘q, shaxsiy transportda harakatlansa bo‘ladimi?

Respublika maxsus komissiyasining 2020 yil 30 martdagi qarori bilan Avtotransport vositalari harakatlanishiga maxsus ruxsatnoma rasmiylashtirishning vaqtinchalik tartibiga ko‘ra, tashkiliy-huquqiy shaklidan qat'i nazar sog‘liqni saqlash tizimidagi tashkilotlarning, tibbiy-sanitariya va epidemiologik xizmatlar ko‘rsatuvchi tashkilotlarning xizmat va xodimlarining shaxsiy avtotransport vositalariga ruxsatnomasiz harakatlanishi belgilangan edi. 

Maxsus komissiyaning 2020 yil 8 apreldagi qarori bilan Avtotransport vositalari harakatlanishiga maxsus ruxsatnomalar talab etilmaydigan holatlar ro‘yxatiga o‘zgartirishlar kiritildi.

Unga ko‘ra, tashkiliy-huquqiy shaklidan qat'i nazar sog‘liqni saqlash tizimidagi tashkilotlar xizmat va xodimlarining shaxsiy avtotransport vositalari ro‘yxatdan chiqarilib, davlat sog‘liqni saqlash tizimidagi tibbiy-sanitariya va epidemiologik xizmatlar ko‘rsatuvchi tashkilotlarning xizmat va xodimlarining shaxsiy avtotransport vositalari ro‘yxatda qoldirildi.

Mazkur ro‘yxatda xususiy tibbiyot muassasalari xodimlarining shaxsiy avtotransport vositalarida harakatlanishlariga ruxsat etilmagan.

Huquqni muhofaza qiluvchi organlar “o‘zini yakkalash” hayot tarziga rioya qilishni talab qilishga haqlimi? 

“O‘zini yakkalash” hayot tarzi “Aholining sanitariya-epidemologik osoyishtaligi to‘g‘risida”gi Qonun va Hukumatning 176-son qaroriga muvofiq joriy etilgani bois, huquqni muhofaza qiluvchi organlar va aynan ichki ishlar organlari “Ichki ishlar organlari to‘g‘risida”gi Qonunga muvofiq, fuqarolardan qonunchilikka rioya qilishlarini, huquqqa xilof harakatlarni to‘xtatishni talab qilish, bu talablar bajarilmagan taqdirda ularni majburlash choralarini qo‘llash huquqiga ega.