Sog‘liqni saqlash vazirligi O‘zbekiston hududlarida so‘nggi 25 kun ichida Covid-19 kasalligining qayd etilishi va sog‘ayish ko‘rsatkichlari dinamikasi bo‘yicha ma'lumotlarni e'lon qildi.
Qoraqalpog‘istonda shu vaqtgacha 114ta holat qayd etilgan (shundan 81tasi so‘nggi 25 kunda), ulardan 101 nafari sog‘aygan (89 foiz), 13 kishi davolanmoqda. Ushbu hududda 30 apreldan boshlab bir hafta davomida birorta zararlanish holati qayd etilmagan, faqat so‘nggi ikki kunda 5 kishiga virusdan zararlanish tashxisi qo‘yilgan.
Toshkent shahrida 15 mart kunidan buyon jami 738ta zararlanish holati qayd etilgan (shundan 411tasi so‘nggi 25 kunda), ulardan 548 nafari sog‘aygan (74 foiz), 5 bemor vafot etgan, 188 bemor davolanishni davom ettirmoqda. O‘tgan vaqt davomida faqat bir kunda - 2 may kuni O‘zbekiston poytaxtida virusdan zararlanish holati qayd etilmagan. So‘nggi ikki kunda jami 63ta yangi zararlanish holati qayd etilgan.
Ma'lumot uchun, Toshkent shahri «sariq» hudud sifatida belgilangan. Sog‘liqni saqlash vazirligi matbuot kotibi Furqat Sanayevning Kun.uz’ga izoh berishicha, Toshkentda qayd etilayotgan o‘sish holatlari chegarada aniqlanayotgan bemorlar bilan bog‘liq, asosan Tojikistondan kirib keluvchilarda virusdan zararlanish holati qayd etilmoqda, shahar hududida so‘nggi haftalarda yangi zararlanish holatlari aniqlanmagan.
Andijon viloyatida shu vaqtgacha jami 166 holat qayd etilgan (shundan 69tasi so‘nggi 25 kunda), bemorlarning 131 nafari sog‘aygan (81 foiz), 31 kishi davolanmoqda. Mazkur hududda 3 maydan boshlab yangi holatlar qayd etilishi to‘xtagandi, ammo 8 may kuni bir kishida virus aniqlandi.
Buxoro viloyatida shu vaqtgacha jami 440 holat qayd etilgan, bemorlarning 404 nafari sog‘aygan (92 foiz), 36 kishi davolanmoqda. Ushbu viloyatdagi holatlar xorijdan kelgan va karantinga joylashtirilgan fuqarolar orasida aniqlangan. Viloyatda so‘nggi haftada jami 12 kishiga (3 may kuni olti, 5 may kuni bir va 8 may kuni besh bemor) virusdan zararlanish tashxisi qo‘yilgan.
