Har bir tuman ichki ishlar organlarida audio-video uskunalari bilan jihozlangan alohida xona tayyorlanadi

Andijon viloyatida bo‘lgan voqea, butun ichki ishlar tizimi rahbariyatini, barcha shaxsiy tarkibni nihoyatda tashvishga soldi. Bu haqda ichki ishlar vazirining o‘rinbosari Rustam Hotamov ichki ishlar organlari faoliyatiga bag‘ishlangan jamoatchilik muloqotida aytib o‘tdi.

Uning qayd etishicha, noma'qul, tizimga tasodifan kirib qolgan xodimlarni ishdan bo‘shatish choralari doimiy ravishda ko‘rib boriladi.

“Shuni ham ta'kidlashni istardim: ichki ishlar xodimlari kundalik faoliyatida tez-tez stress, zo‘riqish holatiga tushib qoladi. Chunki ular jinoyatchilik holatlari bilan bevosita to‘qnashadi. Shuning uchun psixologik ta'minot ishlarini yanada kuchaytirishimiz kerak. Tizimda sog‘lom fikrlaydigan, halol, pok, vijdonli, vatanparvar xodimlarimiz ko‘pchilikni tashkil etadi”, - deydi u.

Vazir o‘rinbosarining ma'lum qilishicha, endilikda har bir tuman ichki ishlar organlarida alohida xona tayyorlanadi, u yerda har bir ichki ishlar xodimi bilan fuqarolar suhbatlari audio-video uskunalari orqali yozib boriladi. 

“Umuman, kaltaklash, tazyiq o‘tkazish holatlarining oldini olishning barcha choralarini ko‘ramiz”, - dedi R. Hotamov.

Eslatib o‘tamiz, joriy yilning 11 iyun kuni Andijonda qiynoqqa solingan fuqaro vafot etdi. 

Aniqlanishicha, IIB JQB tezkor vakillari ish yurituvdagi ariza yuzasidan fuqaro A.A.ni IIB ma'muriy binosiga olib kelib, hayoti va sog‘ligi uchun xavfli bo‘lgan zo‘rlik ishlatib, noqonuniy ravishda ushlab turganliklari oqibatida uning huquqlari va qonuniy manfaatlariga jiddiy zarar yetkazilishiga sababchi bo‘lgan.