«Hilol nashr» nashriyotida yana 20 ming adadda Qur'oni Karim – Mushafi sharif chop etildi

Nashriyot mas'ullarining Kun.uz’ga ma'lum qilishicha, 20 ming nusxada chop etilgan Mushafning muqovasi va sahifalari uchun bu safar qizil rang asos qilib olingan.

Mushafi sharif 37 ming so‘m narxda sotuvga chiqarilgan bo‘lib, kitobxonlarning talab va istaklarini e'tiborga olgan holda nashriyotning O‘zbekiston bo‘ylab barcha do‘konlarida sotilmoqda.

Ushbu mushafi sharif tobe'in Hafs ibn Sulaymon ibn Mug‘iyra al-Asadiy al-Ko‘fiy Osim ibn Abun-Najud al-Ko‘fiydan rivoyat qilgan, u Abu Abdurrahmon Abdulloh ibn Habib Sulamiydan, u esa Usmon ibn Affon, Aliy ibn Abu Tolib, Zayd ibn Sobit va Ubay ibn Ka'b roziyallohu anhumdan, ular esa Nabiy sollallohu alayhi vasallamdan naql qilgan qiroatga muvofiq tarzda yozilgan va belgilari qo‘yilgan.

2020 yilning 2 dekabr kuni ham «Hilol nashr» nashriyoti Dorus Salom nusxasi asosida Mushafi sharifning 20 ming adaddagi nashrini chop etgan edi. Shuningdek, endilikda har 3 oyda yangi mushaflar chop qilib, taqdim etilishi rejalashtirilayotgani ma'lum qilingan.

Kecha sotuvga chiqarilganlarini ham qo‘shib hisoblaganda, mustaqillik yillarida ushbu nashriyot tomonidan O‘zbekistonda chop etilgan mushaflar soni jami 175 mingtaga yetdi.