Jizzaxning bir tumanidan o‘g‘irlangan avtomashina ikkinchi tumanidan shikastlangan holda topildi

Jizzax viloyati Zarbdor tumanidan o‘g‘irlangan avtomashina shikastlangan holda Zomin tumanidan topilgan. Bu haqda IIV huzuridagi tergov departamenti xabar bermoqda.

Ma'lum qilinishicha, 2021 yilning 14 aprel kuni soat 20:40da Zarbdor tuman IIBga fuqaro 37 yoshli I.Ma'ruf o‘ziga tegishli «DOGAN S» rusumli avtomashinasi o‘g‘irlangani yuzasidan xabar bergan. Olib borilgan tezkor-qidiruv harakatlari natijasida, avtomashina Zomin tumani Dashtobod shaharchasi hududida shikastlangan holatda topilgan.

Mazkur holat yuzasidan Zarbdor tuman IIB huzuridagi tergov guruhi tomonidan jinoyat kodeksining 267-moddasi 1-qismi (Transport vositasini olib qochish) bilan jinoyat ishi qo‘zg‘atilgan.

Tergov harakatlari davomida, ushbu jinoyatni 28 yoshli A.Ilhom mast holatda sodir etganligi, u Sirdaryo viloyati Xovos tumanida yashovchi tanishining oldiga borib kelish maqsadida avtomashinani olib qochganligi aniqlangan.

Qayd etilishicha, hozirda A.Ilhom protsessual tartibda ushlanib, tergov harakatlari olib borilmoqda.