Samarqandda ota egiz farzandlari uchun 84 million so‘m aliment to‘ladi

Samarqand viloyati Payariq  tumanida ota egiz farzandlari uchun 84 million so‘m aliment to‘lagan. Bu haqda tuman MIB bo‘limi xabar bermoqda.

Ma'lum qilinishicha, Fuqarolik ishlari bo‘yicha Ishtixon tumanlararo sudining qarori bilan fuqaro B.J.dan undiruvchi B.G.ga ikki nafar farzandining moddiy ta'minoti uchun daromadining uchdan bir qismi miqdorida aliment undirish belgilangan.

Bu holat bo‘yicha MIB Payariq bo‘limi tomonidan ijro ishi yuritilgan. Ammo fuqaro B.J. aliment to‘lovlarini to‘lamasdan kelgan. MIB xodimlari tomonidan qarzdor B.J. bilan tushuntirish ishlari o‘tkazilgan va unga farzandlarini moddiy qo‘llab-quvvatlash har bir otaning burchi ekani tushuntirilgan.

Bunday maslahat va suhbatdan o‘ziga to‘g‘ri xulosa chiqargan qarzdor ota o‘sha kuni farzandlari ta'minotini o‘ylab, shu paytgacha bo‘lgan qarzi 84 million 280 ming so‘m pulni to‘lab bergan.